ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން އެމަނިކުފާނަށް ހޮސްޕިޓަލުގައި ފަރުވާދެމުން ދަނިކޮށް ވިންދުވެސް ހުއްޓުނު ކަމަށް ނަޝީދަށް ފަރުވާ ދެއްވި އޭޑީކޭ ހޮސްޕިޓަލްގެ ޑޮކްޓަރު އަބްދުﷲ ނިޔާފް ވިދާޅުވެއްޖެ އެވެ.

ޑރ. ނިޔާފް އެފަދައިން ވިދާޅުވީ ކްރިމިނަލް ކޯޓުގައި މިއަދު މި މައްސަލައިގައި ކުރިއަށް ގެންދިޔަ ޝަރީއަތުގެ މަޖިލީހުގައި ހެކިބަސް ދެއްވަމުންނެވެ.

2021 މޭ 6 ވަނަ ދުވަހުގެ ރޭ ރައީސް ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން އެމަނިކުފާނަށް އޭޑިކޭ ހޮސްޕިޓަލުގައި އަދި ރާއްޖެއިން ބޭރުންވެސް ފަރުވާ ހޯއްދެވި އެވެ. އަދި ފުރާނަ ސަލާމަތް ކުރުމަށް ބޮޑެތި އޮޕަރޭޝަންތަކެއް ކުރަންޖެހުނުކަން މީގެކުރިން އޭޑީކޭގެ ޑޮކްޓަރުން ފާހަގަ ކުރެއްވި އެވެ.

މި މައްސަލައިގައި މިއަދު ކުރިއަށް ގެންދިޔަ އަޑުއެހުމުގައި ވަނީ ބޮމުގެ ހަމަލާއާ ގުޅިގެން ރައީސް ނަޝީދަށް ލިބުނު އަނިޔާތައް ސާބިތުކުރުމަށް، މެޑިކަލް ރިޕޯޓް ތައްޔާރު ކުރެއްވި ޑރ. ނިޔާފްގެ ހެކިބަސް ނަގާފަ އެވެ. އެގޮތުން ހެކިބަސް ދެއްވަމުން ޑރ. ނިޔާފް ވިދާޅުވީ، ހޮސްޕިޓަލަށް ނަޝީދު ގެނައިރުވެސް ގައިގައި ގިނަ އަދަދަކަށްް ލޭ ހުރި ކަމަށާއި އަދި ލޭ އަންނަމުން ދިޔަ ކަމަށެވެ.

ބޮމުގެ ހަމަލާއާ ގުޅިގެން ނަޝީދުގެ ގައިތެރޭގައި ދަގަނޑު ރޭޒާފުށްތަކެއް ހުރި ކަމަށާއި އަދި ޕްލާސްޓިކު ކޮޅުތަކެއްވެސް ހަށިގަނޑުން ނެގި ކަމަށް ނިޔާފް ވިދާޅުވި އެވެ. ނަޝީދުގެ ވާތުފުއްޕާމެއަށް ވައިނުވަދެ އެއްކޮށް ހިނދިފައިވާ ކަމަށާއި މޭކަށިގަނޑު ފޫއަޅުވާލައި ރޭޒާފުށްތައް ފުއްޕާމެއަށް ވަދެފައިހުރި ކަމަށެވެ. ބޮޑުގޮހޮރަށްވެސް ރޭޒާ ފުށްތައް ވަދެފައި ހުރި ކަމަށާއި ފަޔާއި ބޮލުގެ ނާށިގަނޑު ކައިރިންވެސް ރޭޒާ ފުށްތައް ނެގި ކަމަށް ވިދާޅުވި އެވެ.

މީގެއިތުރުން މައި ލޭ ހޮޅި ތެރެއަށް ވެސް ރޭޒާފުކެއް ވަދެފައި ހުރުމުން އެ ރޭޒާފުށް ނަގަން ގިނަ މަސައްކަތްތަކެއް ކުރަން ޖެހުނު ކަމަށް ވިދާޅުވި އެވެ. އަދި އެ ރޭޒާފުށް ނެގުމަށް މަސައްކަތް ކުރިއިރު ނަޝީދުގެ ވިންދުވެސް ހުއްޓުވުނު ކަމަށް ވިދާޅުވި އެވެ. އަލުން ވިންދު އައީ ސީޕިއާރްދީގެންކަން ޑރ. ނިޔާފް ފާހަގަ ކުރެއްވި އެވެ.

މި މައްސަލައިގައި ދައުވާކޮށްފައިވާ އެއްވެސް މީހެއްގެ ވަކީލަކު ޑރ. ނިޔާފްއާ ސުވާލު ކޮށްފައެއް ނުވެއެވެ. ދައުވާ ލިބޭ ފަރާތްތަކުގެ ވަކީލުން ބުނެފައިވަނީ ނަޝީދަށް ލިބުނު އަނިޔާއަށް ދެކޮޅު ނަހަދާ ކަމަށާއި އެހެންކަމުން އެ އަނިޔާތައް ސާބިތު ކުރުމަށް ދައުލަތުން ހުށަހަޅާފައިވާ ހެކިން ހާޒިރު ނުރުނިޔަސް އިއުތިރާޒެއް ނެތް ކަމަށެވެ.

މި މައްސަލައިގައި ދައުވާ އުފުލާފައިވާ މީހުން:

• އިސްހާގު، މއ. ކުދެހިގެ / ކ.މާލެ

ދައުވާތައް: ގޮވާތަކެތި އެހެން ތަނަކަށް ގެންދިއުމުގެ ދައުވާ، ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އަދި ޓެރަރިޒަމްގެ އަމަލެއް ހިންގުމުގައި ބައިވެރިވުމުގެ ދައުވާ

• މުޖާޒު އަހުމަދު، މއ. ފޭރުގެ / ކ. މާލެ

ދައުވާތައް: ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ އަދި ކުށެއްކޮށްފައިވާ މީހަކު ފިލުވުމަށް އެހީތެރިވެދިނުމުގެ ދައުވާ

ރައީސް މުހައްމަދު ނަޝީދު ކްރިމިނަލް ކޯޓު