ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ފޯރުކޮށްދޭ ”ފަތުރުވެށި“ ކުނި ނެގުމުގެ ހިދުމަތް ހޯދުމަށް ސިއްރު ފެންފުށި ލެގޫން ރިޒޯޓް އިން އެއްބަސްވެއްޖެ އެވެ.
މި އެއްބަސްވުމުގައި ދެ ކުންފުނީގެ ފަރާތުން ސޮއިކޮށްފައިވަނީ އިއްޔެގެ ވަގުތެއްގަ އެވެ.
ސިއްރު ފެންފުށިން މި ހިދުމަތާއި ގުޅުމުގެ ކުރިން ވެމްކޯގެ މި ހިދުމަތް ހޯދަމުން ދިޔައީ 8 ކުންފުންޏަކުންނެވެ. ސިއްރު ފެންފުއްޓާއެކު މި ހިދުމަތް ހޯދާ ރިޒޯޓުތަކުގެ އަދަދު މިވަނީ 9 އަކަށް އަރާފަ އެވެ.
ވެމްކޯއިން ބުނީ މިއީ ދެމެހެއްޓެނިވި ގޮތެއްގައި ކުނި މެނޭޖް ކުރުމަށް އެ ކުންފުނިން ގެންގުޅޭ އަޒުމު އިތުރަށް ހަރުދަނާކޮށްދޭނެ ކަމެއްކަމަށެވެ.
ވެމްކޯއިން ރިސޯޓުތަކުން ކުނި ނަގައިދިނުމުގެ ހިދުމަތް ފަށާފައިވަނީ މިއަހަރުގެ ޖުލައި މަހުގެ 11 ވަނަ ދުވަހު އެވެ. މި ހިދުމަތް ހޯދަން ފެށި އެންމެ ފުރަތަމަ ރިސޯޓުތަކަކީ ކޮކޯން މޯލްޑިވްސްއާއި އަލިލާ ކޮޓެއިފަރުއާއި ނޮކު މޯލްޑިވްސް އެވެ.
ވެމްކޯއިން ބުނެފައިވާ ގޮތުގައި، މި ހިދުމަތް ރިސޯޓުތަކަށް ފޯރުކޮށްދިނުމުގެ މައިގަނޑު މަޤްޞަދަކީ މާލީ ގޮތުން ސަރުކާރަށް ބަރޯސާނުވެ، ފައިދާވާ ކުންފުންޏެއްގެ ގޮތުގައި ދެމިހުރުމެވެ. އަދި މި ހިދުމަތަކީ ކުންފުނީގެ އާމްދަނީ ބޮޑުތަނުން އިތުރުކޮށްދޭނެ ހިދުމަތެއްގެ ގޮތުގައިވެސް ވެމްކޯއިން ސިފަކޮށްފައިވެ އެވެ.
މި ހިދުމަތް ފުޅާވެގެން ދިއުމާއެކު، ރާއްޖޭގެ ޓޫރިޒަމް ދާއިރާގައި ކުނި މެނޭޖްކުރުމުގެ ނިޒާމު ހަރުދަނާވެ، ތިމާވެށި ރައްކާތެރިކުރުމަށް އިތުރު ބާރެއް ލިބިގެންދާނެ ކަމަށް ބެލެވެ އެވެ.
