ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) ގެ ދަށުން ހިންގާ ކުންފުންޏަކަށް ފެނަކަ ހެދުމަށް އެސްޓީއޯއިން ކުރަމުން އައި މަސައްކަތް އެ ކުންފުންނިން ހުއްޓާލައިފި އެވެ.
އެސްޓީއޯއިން މިކަން އިއުލާންކޮށްފައިވަނީ އެކުންފުނިން ނެރުނު އިއުލާނެއްގަ އެވެ.
އެސްޓީއޯގެ އިއުލާންގައި ބުނެފައިވަނީ ފެނަކަ، އެސްޓީއޯގެ ދަށަށް ބަދަލުކުރުމަށް އެސްޓީއޯއިން ކުރަމުންދާ މަސައްކަތް ހުއްޓާލުމަށް ނޮވެމްބަރު 24، 2024 ގައި ފިނޭންސް މިނިސްޓްރީން އެ ކުންފުންޏަށް އަންގާފައިވާތީއާއި އަދި އެ ކުންފުނިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނިފައިވާ ކަންކަން ކުރިއަށް ގޮސްފައިވާ މިންވަރަށް ބަލާ އެސްޓީއޯއިން ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް އެސްޓީއޯގެ ޑިރެކްޓަރުންގެ ބޯޑުން ނިންމާވާފާތީ އެ މަސައްކަތް ހުއްޓާލުމަށް ނިންމާފައިވާ ކަމަށެވެ.
ފެނަކައިގެ ސައްތައިންސައްތަ ހިއްސާ، އެސްޓީއޯއިން ގަނެ އެ ކުންފުނީގެ ސަބްސިޑަރީ ކުންފުންޏެއްގެ ގޮތުގައި ފެނަކަ ހަމަޖެއްސެވުމަށް ވަޒީރުންގެ މަޖިލީހުގެ ލަފަޔާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ އޮގަސްޓް މަހުގެ ފަހު ކޮޅު އެވެ.
