ކައުންސިލްތަކަށް ފަޅުރަށް ދޫކުރުމަށް ހުށަހެޅި 3 ޕްރޮޕޯޒަލެއް އިވެލުއޭޓްކޮށް ނިންމާފި އެވެ.

މި މަޢުލޫމާތު ހާމަކުރެއްވީ ސިޓީސް މިނިސްޓަރ އާދަމް ޝަރީފް އުމަރު އެކްސްގައި ކުރެއްވި ޓްވީޓެއްގައެވެ.

މިނިސްޓަރުގެ ޓްވީޓްގައި ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނުކުރެއްވި ސިޔާސަތުގެ ދަށުން އެކުލަވާލި އުސޫލާ އެއްގޮތަށް ހުށަހެޅުނު 3 ޕްރޮޕޯޒަލް މިއަދު އިވެލުއޭޓްކޮށް ނިމިފައިވެ އެވެ. އިވެލުއޭޓްކުރެވުނު ޕްރޮޕޯޒަލްތަކުގެ ތެރޭގައި ހިމެނެނީ:

1. ރ. އިނގުރައިދޫ ކައުންސިލުން ހުށަހެޅި ރ. ނެޔޮ
2. ދ. އަތޮޅު ކައުންސިލުން ހުށަހެޅި ދ. މިނިމަސްގަލި އަދި ފެންފުށި
3. ލ. މާވަށު ކައުންސިލުން ހުށަހެޅި ލ. ބޮޑުމާބުޅަލި

މިނިސްޓަރު އިތުރަށް ވިދާޅުވި ގޮތުގައި، މިކަމާ ގުޅޭ ރިޕޯޓް އަންނަ ހަފްތާގައި ރައީސް އޮފީހަށް ހުށަހެޅޭނެއެވެ. އަދި ކައުންސިލްތަކަށް ފަޅުރަށްތައް ދޫކުރުމުގެ އެންމެ ބޮޑު ބޭނުމަކީ ކައުންސިލްތައް މާލީގޮތުން ބާރުވެރި ކުރުވުމަށް ރައީސް ކުރައްވާ މުހިންމު މަސައްކަތްޕުޅެއްކަން ފާހަގަކުރެއްވިއެވެ.

ސިޓީސް މިނިސްޓްރީން ކުރިން ކޮށްފައިވާ އިޢުލާނެއްގައި ބުނެފައިވާ ގޮތުން، ކައުންސިލުތަކަށް ޖުމްލަ 28 ރަށެއް 25 އަހަރުގެ މުއްދަތަށް ދޫކުރުމަށް ވަނީ ހަމަޖެހިފައެވެ. މި ރަށްތަކުގެ ތެރޭގައި ހިމެނެނީ ހދ. ފަރިދޫ، ރ. ކުޑަތުޅާދޫ، ތ. ކަކޮޅަސް، އަދި އެހެނިހެން ރަށްތަކެވެ.

މި ޕްރޮގްރާމްގެ ދަށުން ކައުންސިލްތަކަށް ފަޅުރަށްތައް ދޫކުރުމަކީ ލާމަރުކަޒީ ނިޒާމު ހަރުދަނާކޮށް، ރަށްރަށުގެ ތަރައްޤީއަށް އިތުރު ފުރުޞަތުތަކެއް ހުޅުވިގެންދާނެ ކަމެއްކަމަށް ބެލެވެއެވެ.

މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް