ކުޑަކުއްޖެއްގެ ބަރަހަނާ މަންޒަރު ގެންގުޅުނު ކަމަށްބުނެ ކުރި ދައުވާ ދަށު ކޯޓުގައި ސާބިތުވުމުން އިއްވި 20 އަހަރުގެ ޖަލު ހުކުމެއް ހައިކޯޓުން ބާތިލުކޮށްފި އެވެ.

މި މައްސަލައިގައި ދަށު ކޯޓުގައި ދައުވާ ކޮށްފައިވަނީ އަސްލަމް ހަސަން ކިޔާ މީހެއްގެ މައްޗަށެވެ. އޭނާގެ މައްޗަށް އުފުލީ ދިވެހިރާއްޖޭގައި އޮރިޔާންކާޑު ގެންގުޅުމުގެ ކުށުގެ ދައުވާއާއި މީހަކު ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ދައުވާ އެވެ. ދަށު ކޯޓުން ވަނީ މި ދެ ދައުވާ ސާބިތުވާ ކަމަށް ކަނޑައަޅައި މި މީހާގެ މައްޗަަށް ޖުމުލަ 20 އަހަރާއި 1 މަހާއި 6 ދުވަހުގެ ޖަލު ހުކުމެއް އިއްވާފަ އެވެ.

މި މައްސަލަ ހައިކޯޓުގައި އިސްތިއުނާފު ކުރުމުން ހައިކޯޓުގައި މައްސަލަ ބެއްލެވި ފަނޑިޔާރުންގެ އިއްތިފާގުން ނިންމި ނިންމުމުގައި ބުނެފައިވަނީ، އަސްލަމް ހަސަން ގެންގުޅުނު ފޯނާ ގުޅޭ މޯބައިލް ފޮރެންސިކް ރިޕޯޓުގައި ބުނެފައިވަނީ، ގިފިލީގައި ”އަންހެނަކު“ ފެންވަރަން ހުރި ވީޑިއޯ ”ކްރިއޭޓް “ ކޮށްފައިވަނީ 2018 ވަނަ އަހަރުގެ ނޮވެންބަރުގެ ފަހުކޮޅުގެ ދުވަހެއްގައި މެންދުރު ކަމަށެވެ. ނަމަވެސް އެ ވީޑީއޯއިން ފެންނަނީ ކުޑަކުއްޖެއްތޯ ކަށަވަރުކުރުމަށް ތަހުޤީޤުން އެއްވެސް ކަމެއް ކޮށްފައިވާކަން އެނގެން ނެތް ކަމަށެވެ.

ހައިކޯޓުން ބުނެފައިވަނީ ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކަށް އަމަލު ކުރުމުގެ ޤާނޫނުގެ ދަށުން މީހަކު ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ކުށުގެ ދައުވާގެ އެންމެ އަސާސީ އެއް އުންސުރަކީ އޮރިޔާންކާޑު ހަދާފައިވަނީ ކުޑަކުއްޖެއްގެ ކަމަށް ވުމުގެ އުންސުރު ކަމަށެވެ. އަދި މި މައްސަލައިގައި ދަށު ކޯޓަށް ހުށަހެޅިފައިވާ ހެކި ޤަރީނާތަކުން ގިފިލި ކަށަވަރުވުމަކުން ނުވަތަ އަންހެނަކުކަން ކަށަވަރުވުމަކުން މިބުނެވުނު ކުށުގެ އެންމެ އަސާސީ އުންސުރު ސާބިތުވާކަމަށް ނުދެކޭ ކަމަށް ހައިކޯޓުން ބުނެފައިވެ އެވެ.

އެހެންކަމުން ހައިކޯޓުގައި މައްސަލަ ބެއްލެވި ތިން ފަނޑިޔާރުންގެ އިއްތިފާގުން މިދިޔަ އަންގާރަ ދުވަހު ހުކުމް ކޮށްފައިވަނީ، ދަށު ކޯޓުގެ ހުކުމުން މީހަކު ކުޑަކުއްޖެއްގެ ޖިންސީ ގުނަވަނެއް ހާމަކޮށް ފެންނަގޮތަށް އޮރިޔާންކާޑު ހެދުމުގެ ދައުވާ އަސްލަމް ހަސަންގެ މައްޗަށް ކަނޑައަޅާފައިވާ ބަޔާއި އެ ކުށުގެ އަދަބުގެ ގޮތުން އިއްވާފައިވާ 20 އަހަރުގެ ޖަލު ހުކުމް ބާތިލު ކުރުމަށެވެ.

ހައި ކޯޓު