ފުލުހުން ޓޯކޮށްފައި ހުރި އުޅަނދުތައް އެ އުޅަނދުތަކުގެ ވެރިފަރާތްތަކުން 60 ދުވަހުގެ ތެރޭގައި ގެންދިއުމަށް މޯލްޑިވްސް ޕޮލިސް ސަރވިސްއިން އިއްޔެ އަންގައިފި އެވެ.
ފުލުހުން ދިވެހި ސަރުކާރުގެ ގެޒެޓުގައި ޝާއިޢުކުރި އިއުލާނެއްގައި ބުނެފައިވާގޮތުން ފުލުހުން ޓޯކޮށްފައިވާ އުޅަނދުތަކުގެ ތެރޭގައި 17 މޮޓޯސައިކަލާއި، 14 ކާރާއި، 2 ވޭނާއި އަދި އެއް ޓްރަކު ހިމެނެ އެވެ. މި އުޅަނދުތަކުގެ ވެރިފަރާތްތަކަށް އިއްޔެއިން ފެށިގެން 60 ދުވަހުގެ މުއްދަތެއް ދީފައިވަނީ އެ އުޅަނދުތައް ގެންދިއުމަށެވެ.
ފުލުހުންގެ އިޢުލާނުގައި އިތުރަށް ބަޔާންކޮށްފައިވާ ގޮތުގައި، މި މުއްދަތުގެ ތެރޭގައި އުޅަނދުތައް ނުގެންގޮސްފިނަމަ، އެއްގަމު ދަތުރުފަތުރުގެ ޤާނޫނަށް ހަތަރުވަނަ އިޞްލާޙު ގެނައުމުގެ ޤާނޫނުގެ ދަށުން ހަމަޖެހިފައިވާ އުސޫލުތަކާ އެއްގޮތަށް އެ އުޅަނދުތައް ނައްތާލުމުގެ މަސައްކަތް ކުރިއަށް ގެންދާނެ އެވެ.
