މެދު އުތުރު ޕްރޮވިންސްގެ ރަށެއްގައި 4 އަހަރުގެ އަންހެން ކުއްޖަކާ ޖިންސީގޮތުން ގޯނާކުރި ކަމަށް ބުނާ މައްސަލައެއް ފުލުހުންނަށް ހުށަހެޅިއްޖެ އެވެ.
މި މައްސަލަ ފުލުހުންނަށް ރިޕޯޓްކޮށްފައިވަނީ މިދިޔަ ނޮވެމްބަރު މަހުގެ 21 ވަނަ ދުވަހު އެވެ.
ފުލުހުން މަޢުލޫމާތު ދެއްވިގޮތުގައި، މި މައްސަލައިގައި ތުހުމަތުކުރެވެނީ މެދު އިތުރު ޕްރޮވިންސް (ކ، އއ، އދ، ވ) ގައި ހިމެނޭ ރަށެއްގެ 18 އަހަރުން ދަށުގެ ފިރިހެން ކުއްޖަކަށެވެ. އަދި މައްސަލައިގެ ޝިކާރައަކަށްވީ 4 އަހަރުގެ އަންހެން ކުއްޖެކެވެ.
ކުޑަކުދިންނާ ގުޅުންހުރި މައްސަލަތަކަކީ ނާޒުކު މައްސަލަތަކަކަށް ވާތީ، މައްސަލައިގެ ޝިކާރައަކަށްވީ ކުއްޖާގެ އައިޑެންޓިޓީ ހާމަނުކުރުމުގެ ގޮތުން، ފުލުހުންވަނީ އެ ކުއްޖާގެ އަތޮޅާއި ރަށް ހާމަކޮށްފައެއް ނުވެ އެވެ.
ފުލުހުން އިތުރަށް ވިދާޅުވިގޮތުގައި، މި މައްސަލައިގެ ތަޙްޤީޤު މިހާރު ކުރިއަށްދާ ކަމަށާއި، އިތުރު މަޢުލޫމާތު ލިބުމުން އާންމުކުރާނެ ކަމަށެވެ.
ކުޑަކުދިންނަށް ޖިންސީ ގޯނާކުރުމަކީ ޤާނޫނީގޮތުން ވަރަށް ބޮޑު ކުށެއް ކަމަށާއި، މިފަދަ މައްސަލަތައް ވަގުތުން ފުލުހުންނަށް ރިޕޯޓްކުރުމަކީ މުހިންމު ކަމެއްކަން ފުލުހުން ފާހަގަކުރެއްވި އެވެ.
