އަންނަ އަހަރު ބާއްވާ ވޯލްޑް ޓްރެވެލް އެވޯޑްސްގައި 15 ނުވަތަ 20 ވަރަކަށް އެވޯޑް ރާއްޖެއިން ހޯދުމަކީ އުންމީދެއް ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
ވަޒީރު މިހެން ވިދާޅުވެފައިވަނީ މިއަހަރު ވޯލްޑް ޓްރެވެލް އެވޯޑްސްގައި ރާއްޖެއަށް ލިބުނު ކާމިޔާބީ ފާހަގަކުރުމަށް ވެލާނާ އިންޓަރނޭޝަނަލް އެއަރޕޯޓްގައި ބޭއްވި ހަފްލާގަ އެވެ.
ވޯލްޑް ޓްރެވެލް އެވޯޑްސް 2024 ގައި ރާއްޖެއަށް ވަނީ ގިނަ އެވޯޑުތަކެއް ލިބިފަ އެވެ. އެގޮތުން 9 ދާއިރާއަކުން އެވޯޑު ލިބުނު އިރު ރާއްޖެއަށް ލިބުނު އެވޯޑުތަކުގެ ތެރެއިން އެންމެ ފާހަގަކޮށްލެވެނީ ވޯލްޑް ލީޑިން ޑެސްޓިނޭޝަން އެވޯޑާއި ވޯލްޑް ލީޑިން ގްރީން ޑެސްޓިނޭޝަން އެވޯޑެވެ. މިއީ ވޯލްޑް ލީޑިން ޑެސްޓިނޭޝަން އެވޯޑު ރާއްޖެއަށް ޖެހިޖެހިގެން ލިބުނު ފަސްވަނަ ފަހަރުކަންވެސް ފާހަގަކޮށްލެވެ އެވެ.
ވީއައިއޭގައި ބޭއްވި ހަފްލާގައި ވާހަކަ ދައްކަވަމުން މިނިސްޓަރު ފައިސަލް ވިދާޅުވީ އަންނަ އަހަރު 15 ނުވަތަ 20 އެވޯޑް ހާސިލްކުރުމަކީ އުންމީދެއް ކަމަށެވެ. އަދި މިއަހަރު ލިބުނު އެވޯޑްތަކަކީ މުޅި ފަތުރުވެރިކަމުގެ ސިނާއަތުގެ އެންމެންގެ ބުރަ މަސައްކަތުން ހޯދުނު އެވޯޑްތަކެއްކަންވެސް ފައިސަލް ފާހަގަކުރެއްވި އެވެ.
ކެޓަގަރީތަކުގައި ވާދަކޮށްގެން އިތުރަށް މަސައްކަތްކޮށްގެން ހޯދޭނެ އެވޯޑްތަކެއް އެބަހުރި. މިއަންނަ އަހަރު އަޅުގަނޑުމެން ޓާގެޓްކުރަނީ 15 ނުވަތަ 20 އަކަށް އެވޯޑް ހޯދުމަށް މަސައްކަތް ކުރުން އެމްއެމްޕީއާރުސީއާއި އަދި އިންޑަސްޓްރީއާއި އެކީގައި.
މީގެ އިތުރުން ފަތުރުވެރިކަމުގެ ދާއިރާގައި މޯލްޑިވިއަންގެ ބައިވެރިވުން މުހިންމުކަން ފާހަގަ ކުރައްވަމުން ފައިސަލް ވިދާޅުވީ ރާއްޖެއަށް އެންމެ ގިނައިން ފަތުރުވެރިން ޒިޔާރަތް ކުރާ މަންޒިލުތަކަށް ކުރިއަށް އޮތް ތަނުގައި ”ވިޒިޓް މޯލްޑިވްސް“ ޖަހައިގެން މޯލްޑިވިއަނުން ދަތުރުކުރާތަން ފެންނަން ބޭނުންވާ ކަމަށެވެ.
މި ރަސްމިއްޔާތުގައި ވަނީ ވެލާނާ އިންޓަރނޭޝަނަލް އެއަރޕޯޓްގައި ބަހައްޓާފައިވާ ”ވޯލްޑްސް ލީޑިންގ ޑެސްޓިނޭޝަން“ މޮނިއުމަންޓަށް 2024 އިތުރުކުރުމަށްފަހު އެ މޮނިއުމެންޓް އަލުން ހުޅުވާފަ އެވެ. މިހާރު އެ މޮނިއުމެންޓްގައި 2020 ވަނަ އަހަރުން ފެށިގެން ހުރިހާ އަހަރެއް އެބަ ހުއްޓެވެ.
ވެލާނާ އިންޓަނޭޝަނަލް އެއާޕޯޓް (ވީއައިއޭ) ވޯލްޑް ޓްރެވެލް އެވޯޑްސް މިނިސްޓްރީ އޮފް ޓޫރިޒަމް ޓުއަރިޒަމް މިނިސްޓަރު އިބްރާހީމް ފައިސަލް
