ޖުލައި 31 ވަނަ ދުވަހު ހުޅުމާލޭގައި ހިނގި ނުރައްކާތެރި އެކްސިޑެންޓްގައި ކާރު ދުއްވަން އިން އިބްރާހީމް އިކްރާމް ކުށަށް އިއުތިރާފުވެއްޖެ އެވެ.
ހުޅުމާލޭގައި ބާރު ސްޕީޑުގައި ދުއްވާފައިދިޔަ ކާރެއް، ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހި ހިނގި މި ނުރައްކާތެރި އެކްސިޑެންޓާއި ގުޅިގެން ތިން މީހެއްގެ މައްޗަށް ދައުވާ ކޮށްފައިވެ އެވެ. އެއީ ކ. މާލެ / އިބްރާހިމް އިކްރާމް، ކ. މާލެ / އިކްރާމުއްރަހްމާން އަދި ގއ. ކަނޑުހުޅުދޫ / ޖިނާހު އިސްމާއިލް އެވެ.
ކްރިމިނަލް ކޯޓުގައި މިއަދު މި މައްސަލައިގެ އަޑުއެހުންތައް ވަނީ ކުރިއަށް ގެންގޮސްފަ އެވެ. އެގޮތުން ދައުލަތުން މި ތިން މީހުންގެ މައްޗަށް ކުރާ ދައުވާތައް ވަނީ އިއްވާފަ އެވެ. އަދި ދައުވާތަކަށް ޖަވާބުދާރީވުމަށް ދިން ފުރުސަތުގައި އިބްރާހީމް އިކްރާމްގެ ވަކީލް ވިދާޅުވީ އިކްރާމް ދައުވާތަކަށް އިއުތިރާފުވާ ކަމަށެވެ. އަދި ދައުލަތާ އެކު އިއުތިރާފު އެއްބަސްވުން ހަދަން ބޭނުންވެ އެކަން ހުށަހަޅާފައިވާ ކަމަށެވެ.
ދެން މި މައްސަލައިގައި ދައުވާކޮށްފައިވާ ދެ މީހުން ވަނީ ދައުވާތަކަށް އިންކާރު ކޮށްފަ އެވެ. ދައުވާތަކަށް މި ދެ މީހުން އިންކާރު ކުރުމުން ދައުލަތުން ވަނީ ހެކި ހާމަކޮށްފަ އެވެ.
މި މައްސަލައިގައި ކާރު ދުއްވި އިބްރާހިމް އިކްރާމްގެ މައްޗަށް އުފުލާފައިވަނީ، އަނިޔާއެއް ދިނުމުގެ ދައުވާ، މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގެ ދައުވާ، މުދަލަށް ގެއްލުން ދިނުމުގެ ދެ ދައުވާ، އެކްސިޑެންޓްވުމުން އެކަމުގެ ރިޕޯޓް ނުކުރުމުގެ ދައުވާ އަދި އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށް ނުދިނުމުގެ ދައުވާ އެވެ.
އެކްސިޑެންޓް ހިނގި ވަގުތު ކާރުގައިއިން އިކްރާމުއްރަހްމާންގެ މައްޗަށް ކުރަނީ އަނިޔާއެއް ދިނުމުގައި ބައިވެރިވުމުގެ ދައުވާ، އެކްސިޑެންޓްވުމުން އެކަމުގެ ރިޕޯޓް ނުކުރުމުގެ ދައުވާ، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށް ނުދިނުމުގެ ދައުވާ، މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގެ ދައުވާ އަދި މުދަލަށް ގެއްލުން ދިނުމުގައި ބައިވެރިވުމުގެ ދެ ދައުވާ އެވެ.
މީގެއިތުރުން ޖިނާހު އިސްމާއިލްގެ މައްޗަށް ވަނީ އަނިޔާއެއް ދިނުމުގައި ބައިވެރިވުމުގެ ދައުވާ، މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގެ ދައުވާ، އަދި މުދަލަށް ގެއްލުން ދިނުމުގައި ބައިވެރިވުމުގެ ދެ ދައުވާ އުފުލާފަ އެވެ.
