ނ. ފޮއްދޫ ބަނދަރުގެ ޑިޒައިން ނިމިފައިވާ ކަމަށާއި، މިހާރު ކުރިއަށް ގެންދަނީ އެންވަޔަރަމެންޓަލް އިމްޕެކްޓް އެސެސްމެންޓް (އީއައިއޭ) ހެދުމުގެ މަސައްކަތް ކަމަށް ކޮންސްޓުރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެ އެވެ.

މިނިސްޓަރ މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުންނެވެ.

މިނިސްޓަރ ވިދާޅުވީ، މި މަޝްރޫއު އަކީ ޑިޒައިނިން ބިލްޑު އުސޫލުން 3 ސެޕްޓެންބަރު 2023 ގައި ހަވާލުކޮށްފައޮ އޮތް މަޝްރޫއުއެއް ކަމަށާއި، އެ މަސައްކަތް ނިންމަން ހަވާލު ކުރީ 392 ދުވަސް ކަމަށެވެ. މީގެ އިތުރުން، އެ މަސައްކަތް ހަވާލު ކުރީ 53.7 މިލިއަން ރުފިޔާއަށް ކަމަށެވެ.

އޭރު އެ ބަނދަރަކީ ޑިޓޭޗް ބަނދަރެއްގެ ގޮތުގައި ޑިޒައިން ކޮށްފައިވާ ބަނދަރެއް ކަމަށާއި، އެހެންނަމަވެސް އެ ޑިޒައިނާ މެދު ރަށުގެ ރައްޔިތުންނާއި މެމްބަރުގެވެސް ވަރަށް ބޮޑު ކަންބޮޑުންތަކެއް ހުރި ކަމަށްވެސް މިނިސްޓަރ ވިދާޅުވި އެވެ.

”އެހެންމަ އަޅުގަނޑުމެން ހަވާލު ވެގެން އަޅުގަނޑުމެން މަސައްކަތް ކުރީ އެ ޑިޒައިން ބަދަލުކޮށްފަ ރަށު ރައްޔިތުން ބޭނުންވާ ގޮތަށް ބަދަލުތަކެއް ގެންނަން. އެގޮތުން ފުރަތަމަ ހެދި ޑިޒައިންގަ އަޅުގަނޑުމެންނަށް ބައެއް ޓޫރިސްޓް ސަރަހައްދުތަކާއި ސްޓޯމް ވޯޓާ ޕަމްޕެއް ހުރި ދިމާލަކުން އެ އިޝޫ ދިމާވާތީ އެ ޑިޒައިނަށް ވެސް އަނެއްކާ ބަދަލުތަކެއް ގެނެވިފަ މިހާރު ފައިނަލް ކުރެވިފަ ވަނީ، މިހާރު ކުރިޔަށްދަނީ މަޝްރޫއުގެ އީއައިއޭ ހެދުމުގެ މަސައްކަތް.“

މިނިސްޓަރ ވިދާޅުވީ، އީއައިއޭ ހެދުމުގެ މަސައްކަތް ލަސްވެގެން ގޮސްފައިވަނީ ކޮންސެޕްޓަށް ވަރަށް ގިނަ ފަހަރު ބަދަލުތަކެއް ގެނެސް ރައްޔިތުން ބޭނުންވާ ގޮތަށް ކުރިޔަށް ގެންދަން ބޭނުންވާތީ ކަމަށެވެ.

ރައްޔިތުންގެ މަޖިލިސް އެންވަޔަރަމެންޓަލް އިމްޕެކްޓް އެސެސްމެންޓް (އީއައިއޭ) މިނިސްޓަރު ޑރ. އަބްދުﷲ މުއްތަލިބު