ދައުލަތުގެ ބަޖެޓުން ނުހިންގޭހައި ގިނަ މަޝްރޫގައި މިދިޔަ ސަރުކާރުން ސޮއިކޮށްފައި ހުރި ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބް ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލު ތަކަށް ޖަވާބު ދެއްވަމުން މިނިސްޓަރު މުއްތަލިބް ވިދާޅުވީ ކޮންސްޓްރަކްޝަން މިނިސްޓަރީގައި 39 ބިލިއަން ރުފިޔާގެ މަޝްރޫއުގައި ސޮއިކޮށްފައި އެބަހުރި ކަމަށެވެ.

މިނިސްޓަރު މުއްތަލިބް ވިދާޅުވީ މިއީ ދައުލަތުގެ އެއްވެސް ބަޖެޓެއްގެ ތެރެއިން ކުރެވޭނެ އަދަދެއްގެ މަސައްކަތެއް ނޫން ކަމަށެވެ. ދައުލަތުގެ ބަޖެޓަށް އާމްދަނީގެ ގޮތުގައި އަހަރެއްގެ ތެރޭގައި 39 ބިލިއަން ރުފިޔާ ނުލިބޭކަން ފާހަގަކޮށް މިނިސްޓަރު މުއްތަލިބް ވަނީ 39 ބިލިއަން ރުފިޔާގެ މަޝްރޫއު ހިންގާނީ ކިހިނެއްތޯ ސުވާލު އުފައްދަވާފަ އެވެ.

ކުރީ ސަރުކާރުން ބަޖެޓް ފާސްކޮށްފައިވަނީ  ކޮންމެ މަޝްރޫއުއަކަށް ވެސް ކުޑަ އަދަދެއް ޖަހައިގެން ކަމަށް މިނިސްޓަރު ވިދާޅުވި އެވެ. އަދި 2023 ވަނަ އަހަރު ވަރަށް ގިނަ މަޝްރޫއުތަކުގައި ސޮއިކޮށް ފަށާފައި ހުރިކަމަށާއި، މިއީ ދައުލަތެއްގެ ބަޖެޓެއްގެ ތެރެއިން ހަރަދު ކުރެވޭނެ ވަރުގެ އަދަދެއް ނޫން ކަމަށް ވެސް ވިދާޅުވި އެވެ.

މީގެއިތުރުން ވާހަކަ ދައްކަވަމުން މިނިސްޓަރު މުއްތަލިބް ވިދާޅުޥީ ވަރަށް ގިނަ ޕްރޮޖެކްޓްތައް ހިނގާއިރު ވަރަށްގިނަ ޕްރޮޖެކްޓްތައް ނުހިނގާ ތަން ވެސް ފެންނާނެ ކަމަށެވެ. ޕްރޮޖެކްޓްތައް ނުހިނގާތަން ފެންނަނީ ސޮއިކޮށްފައި ހުރި މަޝްރޫއުތައް ކުރިއަށް ގެންދިޔުމަށް ބޭނުންވާ އަދަދަށް ބަޖެޓްގައި ފައިސާނެތި ބައިކުޅަބަޔަށް ބަޖެޓުގައި ހިމެނިފައި އޮތުން ކަމަށްވެސް މިނިސްޓަރު ވިދާޅުވި އެވެ.

ރައްޔިތުންގެ މަޖިލިސް މިނިސްޓަރު ޑރ. އަބްދުﷲ މުއްތަލިބު މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ދައުލަތުގެ ބަޖެޓް