މޯލްޑިވްސް ބިއުރޯ އޮފް ސްޓެޓިސްޓިކްސްގެ ފަރާތުން މި އަހަރު ކުރިއަށް ގެންދިއުމަށް ހަމަޖެހިފައިވާ ”ލޭބަރ ފޯސް ސާވޭ“ ގްރޭޓަރ މާލެ ސަރަހައްދުގައި ބުރާސްފަތި ދުވަހު ފެށުމަށް ނިންމައިފި އެވެ.
މި ސާވޭއަކީ ރާއްޖޭގެ ވަޒީފާގެ ބާޒާރާ ގުޅޭ މުހިންމު ތަފާސް ހިސާބު އެއްކުރުމަށް ކުރެވޭ ޤައުމީ ފެންވަރުގެ ސާވޭއެކެވެ.
މޯލްޑިވްސް ބިއުރޯ އޮފް ސްޓެޓިސްޓިކްސްއިން މަޢުލޫމާތުދޭ ގޮތުގައި، މި ސާވޭއިން އެއްކުރެވޭ މަޢުލޫމާތުގެ އަލީގައި މަސައްކަތް ލިބިފައިވާ އާބާދީގެ ނިސްބަތާއި، މަސައްކަތް ލިބިފައި ނުވާ އާބާދީގެ ނިސްބަތް ފަދަ ވަޒީފާގެ ބާޒާރާ ގުޅޭ އިންޑިކޭޓަރުތައް އެކުލަވާލެވޭނެއެވެ.
މި ސާވޭގައި މަޢުލޫމާތު ނެގޭނެ މައިގަނޑު ބައިތަކުގެ ތެރޭގައި ގޭބިސީގެ ވަކިވަކި ފަރުދުންގެ އާންމު މަޢުލޫމާތު، ހިޖުރަކުރުމާ ގުޅޭ މަޢުލޫމާތު، ހާސިލުކޮށްފައިވާ ތަޢުލީމާ ގުޅޭ މަޢުލޫމާތު، ވަޒީފާއާއި އާމްދަނީ ހޯދުމުގެ މަސައްކަތްކުރާ އާބާދީގެ ތަފްސީލު، އަދި އާމްދަނީ ލިބޭ އަދި އާމްދަނީ ނުލިބޭގޮތަށް ކުރާ މަސައްކަތްތަކުގެ ތަފްސީލު ހިމެނެއެވެ.
ބިއުރޯއިން އިތުރަށް ފާހަގަކުރި ގޮތުގައި، މި ސާވޭއަކީ ތަފާސްހިސާބުގެ ޤާނޫނުގެ ދަށުން ހުއްދަ ލިބިގެން ކުރާ ސާވޭއެކެވެ. އަދި މި ސާވޭއިން އެއްކުރެވޭ ވަކި ފަރުދެއް ނުވަތަ ގޭބިސީއެއްގެ މަޢުލޫމާތަކީ ސިއްރެއްގެ ގޮތުގައި ހިފެހެއްޓޭނެ އެއްޗެކެވެ.
ޤާނޫނުގައި ކަނޑައެޅިފައިވާ ގޮތަށް ހުއްދަ ލިބިގެން ސަރުކާރުގެ ބޭނުމަކަ ބޭނުމަކަށް މަޢުލޫމާތު އެއްކުރުމުގެ މަސައްކަތުގައި އުޅޭ މީހަކު އެދިއްޖެ ހިނދެއްގައި، ކަނޑައެޅިފައިވާ މުއްދަތެއްގެ ތެރޭގައި ތެދު މަޢުލޫމާތު ދިނުމަކީ އާންމުންގެ މަސްއޫލިއްޔަތެކެވެ.
