ޅ. އަތޮޅުގައި ބަޔޯސްފިއާ ރިޒާވެއް ގާއިމްކުރުމަށް މައުލޫމާތު އެއްކުރުމުގެ ސާވޭއެއް އަންނަ އަހަރު ފަށާނެ ކަމަށް މިނިސްޓަރ އޮފް ކްލައިމެޓް ޗޭންޖް، އެންވަޔަރަންމަންޓް، އެންޑް އެނާޖީ ޠާރިޤު އިބްރާހީމް އިއުލާން ކުރައްވައިފި އެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަ ދައްކަވަމުން މިނިސްޓަރު ހާމަކުރެއްވި ގޮތުގައި ސަރުކާރުން އާ ބަޔޮސްފިއާ ރިޒާވްތަކަށް އެޕްލިކޭޝަން ހުށަހެޅުމަށް ދައުވަތު ދިނުމުން ޕްރޮޕޯސަލް ހުށަހެޅީ ހަމައެކަނި ޅ. އަތޮޅުން ކަމަށެވެ. އެ ހުށަހެޅުން ފައިނަލްކޮށްފައިވާއިރު، 2025 ވަނަ އަހަރު މިކަމުގެ އަމަލީ މަސައްކަތް ފެށުމުގެ ތައްޔާރީތައް ދަނީ ކުރަމުން ނެވެ.
މިނިސްޓަރު ކަށަވަރުކޮށްދެއްވި ގޮތުގައި ބަޔޯސްފިއާ ރިޒާވެއްގެ ގޮތުގައި އެ އަތޮޅު ޔުނެސްކޯއަށް އެޕްލައި ކުރުމަށް ހަ އަހަރު ނަގާނެ ކަމަށް ބެލެވޭ ސާވޭ އާއި ދިރާސާތައް ހަދަން ޖެހޭނެ ކަމަށެވެ. މި މަޝްރޫއަށް ބޭނުންވާ ފައިސާ މިހާރު ވަނީ ކަނޑައަޅާފަ އެވެ.
ކުރިއަށް އޮތް ފަސް އަހަރުގެ ތެރޭގައި އިތުރު ތިން ބަޔޯސްފިއާ ރިޒާވް ކަނޑައަޅައި އާ ނޭޗާ ޕާކްތައް އުފެއްދުމަކީ ރައީސް ޑރ. މުހައްމަދު މުއިއްޒުގެ މުހިންމު ވައުދެކެވެ. މިވަގުތު މޯލްޑިވްސްގައި ޔުނެސްކޯގެ ތިން ބަޔޮސްފިއާ ރިޒާވް ހުންނަނީ ބ. އަތޮޅު، އައްޑޫ ސިޓީ، އަދި ފުވައްމުލައް ސިޓީގަ އެވެ.
މިނިސްޓަރު ވަނީ ގުދުރަތީ ރީތިކަން ދެމެހެއްޓުމާއި ދެމެހެއްޓެނިވި ތިމާވެށްޓެއް ކުރިއެރުވުމުގައި ބަޔޯސްފިއާ ރިޒާވްތަކުގެ ދައުރު ވަރަށް މުހިންމުކަން ފާހަގަކުރައްވާފަ އެވެ. މި ރިޒާވްތައް ކަނޑައެޅުމާއި ދިގު މުއްދަތަކަށް ބެލެހެއްޓުމަށް ވެސް އާންމުންނާއި އިދާރާތަކުގެ ބައިވެރިވުމަކީ ވަރަށް މުހިންމު ކަމެއް ކަމަށް އޭނާ ފާހަގަކުރެއްވި އެވެ.
ބަޔޯސްފިއާ ރިޒާވެއް ކަނޑައެޅުމުން ތިމާވެށި ހިމާޔަތްކުރުން އިތުރުވެ، ފަތުރުވެރިކަމަށް ވަރަށް ބޮޑަށް އެހީތެރިވެދީ، މި ސަރަހައްދަށް އިގްތިސާދީ ފައިދާތަކެއް ލިބެ އެވެ. ރިޒާވްތައް ކޮންމެ ދިހަ އަހަރަކުން އެއް އަހަރު ވަޒަންކުރާއިރު، އެއީ ޔުނެސްކޯގެ މިންގަނޑުތަކަށް ފެތޭ ރިޒާވްތަކެއްތޯ ބެލުމަށް ސާވޭތައް ހަދަން ޖެހެ އެވެ.
މިނިސްޓަރ ޠާރިޤު އިބްރާހީމް މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީ
