ތަދުކަނޑުވަން ބޭނުންކުރާ 2 ބޭހެއް ބޭނުން ކުރުމާއި، ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން ވަގުތީގޮތުން މަނާކުރައްވައިފި އެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މިއަދު ނެރުނު ބަޔާނުގައި ބުނެފައި ވަނީ، ރާއްޖޭގެ މާކެޓުގައި ލިބެން ހުންނަ ބޭހަކީ ފެންވަރު ރަނގަޅު, ރައްކާތެރި ބޭސްކަން ކަށަވަރުކުރުމަށްޓަކައި އެ އޮތޯރިޓީން ގެންދަނީ ގިނަ މަސައްކަތްތަކެއް ކުރަމުން ކަމަށެވެ.
އެގޮތުން، އެމްއެފްޑީއޭ އިން ބޭނުން ނުކުރުމަށް އަންގާފައި ވަނީ މެލޭޝިއާގެ ކުންފުންޏަކުން އުފައްދާފައިވާ، އެކްސެލް މެފެނަމިކް އެސިޑް ސަސްޕެންޝަންއާއި ޕާކިސްތާންގެ ކުންފުންޏަކުން އުފައްދާފައިވާ، މެފްނެކް އެވެ.
އެމްއެފްޑީއޭއިން ބުނީ އެ އޮތޯރިޓީގެ ފަރާތުން އެ 2 ބޭހުގެ ކޮންފާމޭޓްރީ ޓެސްޓް ހެދުމަށްޓަކައި ރާއްޖޭން ބޭރަށް ފޮނުވުމުގެ މަސައްކަތް ކުރަމުންދާ ކަމަށެވެ.
އެހެންކަމުން، އެމްއެފްޑީއޭއިން ވަނީ، މި ވަގުތަށް ބޭސް ފިހާރަތަކާއި ބޭސް ގުދަންތަކުގައި ހުރި އެ ބޭސް ސްޓޮކާއި ވަކިކޮށް ބެހެއްޓުމަށް އިލްތިމާސްކޮށްފަ އެވެ.
