މީގެ ކުރިން ނޭޝަނަލް ޑްރަގް އެޖެންސީ (އެންޑީއޭ) ގެ ސީއީއޯގެ މަގާމު އަދާކުރެއްވި އިމާދު ސޯލިހު އައްޑޫ ސިޓީ ކައުންސިލްގެ ސެކްރެޓަރީ ޖެނެރަލްގެ މަގާމަށް އައްޔަންކޮށްފި އެވެ.
އައްޑޫ ސިޓީ ކައުންސިލުން ބުނީ އިމާދު އެ މަގާމަށް އައްޔަން ކުރީ އާދީއްތަ ދުވަހު ކަމަށެވެ.
ސިވިލް ސާވިސް ކޮމިޝަނުން އައްޔަން ކުރާ އެ މަގާމު ކުރިން ފުރުއްވީ އަހުމަދު ޝުޖާއު އެވެ.
އިމާދު ވަނީ ނޮވެމްބަރު 1، 2022 އިން ޖުލައި 3، 2024 އަށް އެންޑީއޭގެ ސީއީއޯގެ މަގާމު އަދާކުރައްވާފަ އެވެ.
އޭނާ މަގާމުން ވަކިކުރީ މެނޭޖްމަންޓަށް ބަދަލު ގެނައުމަށް ފަހު ބޭއްވި ފުރަތަމަ ބައްދަލުވުމުގައި ހުރިހާ ބޯޑު މެމްބަރުންގެ އިއްތިފާގުން ނެވެ.
އެމީހުން އޭރު ބުނީ އޭނާ ވަޒީފާއިން ވަކިކުރީ އެމީހުން ކުރި އެސެސްމަންޓެއްގެ ނަތީޖާއަށް ބަލައިގެން ކަމަށެވެ. އަދި އޭނާގެ ސީއީއޯކަމުގެ ދަށުން އެންޑީއޭގެ މަސައްކަތްތައް އަވަސް ދުވެލީގައި ކުރިއަށްނުދާ ކަމަށް އެ އެސެސްމެންޓަށް އިޝާރާތްކޮށް، މެންބަރުން ބުނެފައި ވެއެވެ.
ސިޓީ ކައުންސިލްގެ ސެކްރެޓަރީ ޖެނެރަލަކަށް މުސާރައިގެ ގޮތުގައި މަހަކު 20،500 ރުފިޔާ އާއި 15،000 ރުފިޔާ އެގްޒެކެޓިވް އެލަވަންސްގެ ގޮތުގައި ލިބެ އެވެ.
