ބޭންކް އޮފް މޯލްޑިވްސްގެ މައްޗަށް ސިވިލް ކޯޓުން ކުރި އަމުރަކާ ގުޅިގެން، ފުޑް އެންޑް އެގްރިކަލްޗަރ އޯގަނައިޒޭޝަން އޮފް ދަ މޯލްޑިވްސް (އެފްއޭއެމް) އިން ޕެންޝަން އޮފީހަށް ދައްކަން ޖެހޭ ލައްކައެއްހާ ރުފިޔާ ދައްކައިފި އެވެ.
ސިވިލް ކޯޓުން މި އަމުރު ކޮށްފައިވަނީ މިދިޔަ ނޮވެންބަރު 7 ވަނަ ދުވަހު އެވެ. މި އަމުރުގައިވަނީ ޕެންޝަން އޮފީހަށް ދައްކަން ޖެހޭ 615،311.46 ރުފިޔާގެ ތެރެއިން ނުދައްކާ އޮތް 103،444.33 ރުފިޔާ ދެއްކުމަށެވެ. މި ފައިސާ ދެއްކުމަށް ކޯޓުން އަމުރުކޮށްފައިވަނީ ބޭންކް އޮފް މޯލްޑިވްސްގައި އެފްއޭއެމްގެ ނަމުގައި އޮތް އެކައުންޓުންނެވެ.
ޕެންޝަން އޮފީހުން މި މައްސަލަ ކޯޓަށް ހުށަހެޅުމާ ގުޅިގެން ކުރި މި އަމުރަށް ފަހު، ބޭންކް އޮފް މޯލްޑިވްސްއިން ވަނީ ސިވިލް ކޯޓަށް 103،444 ރުފިޔާ 33 ލާރި ދައްކާފަ އެވެ.
އެފްއޭއެމްއިން ނުދައްކާ އޮތް 615،311.46 ރުފިޔާއަކީ 2019 ވަނަ އަހަރުގެ އޮކްޓޫބަރު 10 ވަނަ ދުވަހު ކުރި ހުކުމަކާ ގުޅިގެން ދައްކަން ޖެހި ނުދައްކާވާ ފައިސާ އެވެ.
ސިވިލް ކޯޓުން އިއްޔެ ކުރި ހުކުމެއްގައި ބުނެފައިވަނީ ބީއެމްއެލްގައި އޮތް އެފްއޭއެމްގެ އެކައުންޓަކުން އެ ކޯޓަށް މި ފައިސާ ދައްކާފައިވާތީ ފައިސާ ދެއްކުމަށް ކުރި ހުކުމް ތަންފީޒުވެފައިވާކަމަށް ހުކުމް ކުރާ ކަމަށެވެ.
