ދެކުނުގެ ރަށެއްގައި އުމުރުން 10 އަހަރުގެ ކުއްޖަކަށް ޖިންސީ ގޯނާކުރި މައްސަލައެއްގައި 51 އަހަރުގެ މީހަކު ހައްޔަރު ކޮށްފި އެވެ.
ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނެފައި ވަނީ، ކުޑަކުއްޖަކަށް ޖިންސީ ގޯނާ ކުރި ކަމަށް ތުހުމަތުކުރެވޭ މައްސަލައެއް އިއްޔެ ރިޕޯޓް ކުރީ ސައުތު ސެންޓްރަލް ޕޮލިސް (މ.، ފ.، ދ.، ތ. އަދި ލ. އަތޮޅު) ގައި ހިމެނޭ ރަށަކުން ކަމަށެވެ.
މި މައްސަލައިގައި 51 އަހަރުގެ މީހަކު ހައްޔަރު ކޮށްފައިވާ ކަމަށާއި، ހައްޔަރުކޮށްފައި ވަނީ ދިވެހި ފިރިހެނެއް ކަމަށްވެސް ފުލުހުން ބުނެފައިވެ އެވެ.
މިފަދަ މައްސަލަތައް ރިޕޯޓް ކުރާ ރަށެއް ހާމަކޮށްފިނަމަ ޖިންސީ ގޯނާގެ ޝިކާރައަކަށްވާ ކުދިންގެ އައިޑެންޓިޓީ ހާމަވުމުގެ ފުރުސަތު އޮންނާތީ މައްސަލަ ރިޕޯޓް ކުރީ ކޮން ރަށަކުން ކަމެއް ފުލުހުން ހާމަކޮސްފައެއް ނުވެއެވެ.
އަދި މިމައްސަލަޢައި ގުޅޭ އިތުރު މައުލޫމާތެއްވެސް ފުލުހުން ހާމަކޮށްފައެއް ނުވެއެވެ.
ފުލުހުން އިތުރަށް ބުނެފައި ވަނީ މި މައްސަލައިގެ ތަހްގީގު ކުރަމުން ގެންދާ ކަމަށެވެ.
