ވިނަރެސް މަޝްރޫއުގެ ދަށުން ފްލެޓު ގަނެފައިވާ ފަރާތްތަކަށް ކާރު ޕާކު ކުރުމަށް ޖާގަ ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފިއެވެ.

މިކަން އެޗްޑީސީން އިއްޔެ ކުރި އިއުލާނެއްގައި ވަނީ ހާމަކޮށްފަ އެވެ.

އެޗްޑީސީން ބުނި ގޮތުގައި ޕާކު ކުރުމުގެ ޖާގަ ދޫކުރާނީ ދެ މޮޑެލެއްގެ ދަށުންނެވެ. އެއީ އިމާރާތުގެ ތެރެއިން ކާރު ރެޖިސްޓްރީ ކުރުމުގެ ހުއްދައާއެކު 76 ޖާގަ އަދި އިމާރާތުގެ ބޭރުން ހަމައެކަނި ޕާކު ކުރުމުގެ ބޭނުމަށް 78 ޖާގައެވެ.

ޕާކިން ޖާގައަށް އެދި ހުށަހެޅުމަށް ޝަރުތުތަކެއް ކަނޑައަޅާފައިވެއެވެ. އޭގެ ތެރޭގައި ފްލެޓު ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކެންޓް ކަމުގައިވުމާއި، އަންނަ މަހުގެ 5 ވަނަ ދުވަހުގެ ނިޔަލަށް އެޗްޑީސީއަށް ދައްކަންޖެހޭ ފައިސާ ދައްކާ ޚަލާސްކޮށްފައިވުން ހިމެނެއެވެ. ކޮންމެ ފަރާތަކަށް ދޫކުރާނީ އެންމެ ޕާކިން ޖާގައެކެވެ.

އިމާރާތުގެ ތެރެއިން ދޫކުރާ ޖާގަތައް ވިއްކާނީ ބީލަމުގެ އުސޫލުންނެވެ. ބީލަން ފެށޭ އަގަކީ 650,000 ރުފިޔާއެވެ. ބީލަން ކާމިޔާބުކުރާ ފަރާތްތަކަށް ޖުމްލަ އަގު ދެއްކުމަށް 30 ދުވަހުގެ މުއްދަތެއް ދެވޭނެއެވެ.

އިމާރާތުގެ ބޭރުން ޕާކު ކުރުމަށް ޖާގަ ކުއްޔަށް ދޫކުރާނީ 5 އަހަރު ދުވަހުގެ މުއްދަތަކަށެވެ. މި ޖާގަތަކުގެ މަހު ކުލީގެ ގޮތުގައި ބީލަން ފެށޭ އަގަކީ 2,000 ރުފިޔާއެވެ. ސެކިއުރިޓީ ޑިޕޮސިޓުގެ ގޮތުގައި 3 މަހުގެ ކުއްޔަށްވާ ފައިސާ ދެއްކުމަށް 7 ދުވަހުގެ މުއްދަތެއް ދެވޭނެއެވެ.

ވިނަރެސް ޓަވަރުތަކުން ބީލަމުގެ އުސޫލުން ދޫކުރާ މި ޖާގަތައް ގަތުމަށް ނުވަތަ ކުއްޔަށް ހިފުމަށް ޝައުގުވެރިވާ ފަރާތްތަކަށް https://bids.hdc.mv އިން އެކަމަށް އެދި ހުށަހެޅުމުގެ ފުރުސަތު އަންނަ މަހުގެ 5 ވަނަ ދުވަހުގެ ނިޔަލަށް ހުޅުވާލާފައިވެއެވެ.

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ހުޅުމާލެ ފޭސް 2 ވިނަރެސް