ރާއްޖޭގައި ސޯޝަލް ހައުސިންގ ޕްރޮޖެކްޓްތައް އެޅުމަށް ބޭރުގެ ދެތިން ކުންފުންޏަކުން ޕްރޮޕޯސަލް ހުށަހަޅާފައިވާކަމަށް ފަހި ދިރިއުޅުން ކޯޕަރޭޝަން (އެފްޑީސީ) ގެ މެނޭޖިންގ ޑިރެކްޓަރު ހަމްދާން ޝަކީލް ވިދާޅުވެއްޖެ އެވެ.
މި މަޢުލޫމާތު ހަމްދާން ހާމަކުރެއްވީ ޖަވިޔަނި ނޫހަށް ދެއްވި ޚާއްޞަ އިންޓަވިއުއެއްގައެވެ.
ހަމްދާން ވިދާޅުވިގޮތުގައި، އެފްޑީސީން މިހާރުވެސް ބޭރުގެ ދެތިން ކުންފުންޏަކާ އެކު މަސައްކަތް ކުރަމުންދާ ކަމަށާއި، އެ ކުންފުނިތަކުން އަމިއްލަ ފައިނޭންސިންގ އާއެކު ރާއްޖޭގެ ސޯޝަލް ހައުސިންގ މަޝްރޫޢުތަކަށް ޕްރޮޕޯސަލްތަކެއް ހުށަހަޅާފައިވެ އެވެ. އަދި މި މަސައްކަތް މިހާރު ބާރު ސްޕީޑުގައި ކުރިއަށްދާކަމަށްވެސް އޭނާ ފާހަގަކުރެއްވި އެވެ.
މިވަގުތު އެފްޑީސީން ކުރިއަށް ގެންދަނީ ދެ ޕްރޮޖެކްޓެކެވެ. އެއީ ކަލްޕަޓަރު ޕްރޮޖެކްޓްސް އިންޓަރނޭޝަނަލް ލިމިޓެޑް (ކޭޕީއައިއެލް) އަދި ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އިންޑިއާ އާ އެކު ކުރިއަށް ގެންދާ ޕްރޮޖެކްޓްތަކެކެވެ. މި ދެ ކުންފުނިން ވެސް ހުޅުމާލޭގައި 2،000 ހައުސިންގ ޔުނިޓް ތަރައްޤީ ކުރަމުން އަންނަކަމަށް ހަމްދާން ހާމަކުރެއްވި އެވެ.
އިތުރަށް ހަމްދާން ވިދާޅުވީ، އެންބީސީސީ އިން އަޅަމުން އަންނަ 16 ޓަވަރުގެ ސްޓްރަކްޗަރަލް މަސައްކަތްތައް ނިމިފައިވާ ކަމަށާއި، ކޭޕީއައިއެލް ޓަވަރުތަކުގެ ފިނިޝިންގ މަސައްކަތުގެ ގާތްގަނޑަކަށް 90 އިންސައްތަ ނިމިފައިވާ ކަމަށެވެ. އަދި ކޭޕީއައިއެލް އިން އަޅަމުން އަންނަ 2،000 ފްލެޓްގެ މަސައްކަތް އަންނަ ޖެނުއަރީއަށް ނިމޭނެކަމަށްވެސް އޭނާ ވަނީ ފާހަގަކުރައްވާފަ އެވެ.
މި ޕްރޮޖެކްޓްތަކަކީ ރާއްޖޭގެ ބޯހިޔާވަހިކަމުގެ ދަތިކަން ޙައްލުކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ބައެއް ކަމަށްވާއިރު، އިތުރު ބޭރުގެ ކުންފުނިތަކުން ޕްރޮޕޯސަލް ހުށަހެޅުމަކީ މި ދާއިރާއަށް ލިބޭނެ ބޮޑު ކުރިއެރުމެއް ކަމުގައި ބެލެވެއެވެ.
