މޯލްޑިވްސް ނޭޝަނަލް ޔުނިވަރސިޓީ (އެމްއެންޔޫ) ގައި މިހާރު 200 ދަރިވަރުން މެޑިސިން ކިޔަވަމުންދާ ކަމަށް ހެލްތު މިނިސްޓަރ އަޙްމަދު ނާޒިމް ވިދާޅުވެއްޖެ އެވެ.
ޖަވިޔަނި ނޫހަށް ދެއްވި އިންޓަވިއުއެއްގައި މިނިސްޓަރ ވިދާޅުވި ގޮތުގައި، 2018 ވަނަ އަހަރުން ފެށިގެން ކޮންމެ އަހަރަކު 25 ނުވަތަ 30 ދަރިވަރުންގެ ބެޗެއް މެޑިސިން ކިޔަވަން އެމްއެންޔޫއަށް ބައިވެރިވަމުން އަންނަ ކަމަށެވެ.
މިނިސްޓަރ ނާޒިމް އިތުރަށް ވިދާޅުވި ގޮތުގައި، މެޑިކަލް ސްކޫލް ތަރައްޤީ ކުރުމަށްޓަކައި ސަރުކާރުގެ ސިޔާސަތުގެ ތެރެއިން އެއްބާރުލުން ދިނުމާއި، ބައިލެޓަރަލް ޕާޓްނަރުން މެދުވެރިކޮށް އެހީ ހޯދައި، ފަންނީ އެހީތެރިކަން ފޯރުކޮށްދިނުމަކީ ސަރުކާރުގެ ސިޔާސަތެއް ކަމުގަ އެވެ.
ދިވެހިރާއްޖޭގެ ޞިއްޙީ ނިޒާމަށް ދިމާވެފައިވާ ގޮންޖެހުންތައް ޙައްލުކުރުމަށް ދިވެހި ޑޮކްޓަރުން އުފެއްދުމަކީ މުހިންމު ކަމެއްކަމަށް މިނިސްޓަރ ފާހަގަކުރެއްވި އެވެ. އަދި ޑޮކްޓަރުން ނުއުފައްދައި މި ގޮންޖެހުންތަކަށް ޙައްލެއް ނުލިބޭނެ ކަމަށްވެސް މިނިސްޓަރު ވިދާޅުވި އެވެ.
މީގެ އިތުރުން، ދިވެހިރާއްޖޭގައި ވަރަށް އަވަހަށް ޓީޗިންގ ހޮސްޕިޓަލެއް ޤާއިމްކުރުމަށް ދައުލަތުން އެމްއެންޔޫއަށް ބިމެއް ދީފައިވާ ކަމަށާއި، އެ ބިމުގައި މިހާރު އެ އިންތިޒާމުތައް ކުރަމުންދާ ކަމަށް މިނިސްޓަރ ނާޒިމް ހާމަކުރެއްވި އެވެ. އަދި މި މަޝްރޫޢުގައި ސަރުކާރުގެ އަމާޒަކީ އެ ތަން ފުޅާކުރެވޭނެ ގޮތަކަށް މަސައްކަތްތައް ރޭވުން ކަމުގައިވެސް މިނިސްޓަރު ވިދާޅުވި އެވެ.
މި ތަރައްޤީތަކާއެކު، ރާއްޖޭގެ ޞިއްޙީ ދާއިރާއަށް ބޭނުންވާ ޑޮކްޓަރުން އުފެއްދުމަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެ ކަމަށް އުންމީދު ކުރެވެ އެވެ.
ހެލްތް މިނިސްޓަރ އަބްދުﷲ ނާޒިމް އިބްރާހިމް މިނިސްޓްރީ އޮފް ހެލްތް
