އިންޑިއާއިން ރާއްޖެއަށް ކަނޑައަޅާ އާ ސަފީރަކަށް އެގައުމުގެ ހާރިޖީ ދާއިރާގައި ފުޅާ ދާއިރާއެއްގައި މަސައްކަތްކުރެއްވި ޖީ. ބަލަސުބްރަމާނިއަން ހަމަޖައްސަވައިފި އެވެ.
އިންޑިއާގެ މި ނިންމުން އެގައުމުގެ އެކްސްޓާނަލް އެފެއާޒްގައި އިއުލާންކޮށްފައި ވެއެވެ.
މިވަގުތު ރާއްޖޭގައި އިންޑިއާ ސަފީރެއްގެ ގޮތުގައި މަސައްކަތްކުރައްވަމުން ގެންދަވަނީ މުނޫ މަހާވަރު އެވެ.
1998 ވަނަ އަހަރުން ފެށިގެން އިންޑިޔާގެ ހާރިޖީ ދާއިރާގައި ބަލަސުބްރަމާނިއަން މަސައްކަތްކުރައްވާފައި ވެއެވެ. މިވަގުތު އޭނާ މަސައްކަތް ކުރައްވަމުން ގެންދަވަނީ ނައިޖީރިޔާގައި ހުންނަ އިންޑިއާ ހައި ކޮމިޝަންގަ އެވެ. 2021 ވަނަ އަހަރުގެ ނޮވެމްބަރު މަހުން ފެށިގެން ރާއްޖޭގައި އިންޑިއާގެ ހައި ކޮމިޝަނަރުގެ މަގާމު ފުރުއްވަމުން އަންނަ މަހާވަރުގެ ބަދަލުގައި ބަލަސުބްރަމަނިއަން މަގާމާއި ހަވާލުވެވަޑައިގަންނަވާނެ ދުވަހެއް އަދި މިވަގުތަށް އިންޑިއާއިން ހާމަކޮށްފައި ނުވެ އެވެ.
ބަލަސުބްރަމާނިއަން ވަނީ ތައިލޭންޑްގެ ވެރިރަށް ބެންގްކޮކްގައި ޑެޕިއުޓީ ޗީފް އޮފް މިޝަންގެ މަގާމު އަދާކުރައްވާފަ އެވެ. އަދި އދ.ގެ އިކޮނޮމިކް އެންޑް ސޯޝަލް ކޮމިޝަން ފޯ އޭޝިއާ އެންޑް ޕެސިފިކްގައި އިންޑިއާގެ ޑެޕިއުޓީ ޕާމަނަންޓް ރެޕްރެޒެންޓޭޓިވްގެ މަގާމުވެސް އަދާކުރައްވާފައި ވެއެވެ.
