މޭޔަރުންނަށް ޑިޕްލޮމެޓިކް ޕާސްޕޯޓް ލިބެންޖެހޭ ކަމަށް ލޯކަލް ގަވަމެންޓާއި ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެ އެވެ.
މިނިސްޓަރު މިހެން ވިދާޅުވެފައިވަނީ ”ޖަވިޔަނި“ އަށް ދެއްވި ޚާއްޞަ އިންޓަވިއުއެއްގަ އެވެ.
އިންޓަވިއުގައި މިނިސްޓަރު ވިދާޅުވި ގޮތުގައި، ޑިޕްލޮމެޓިކް ޕާސްޕޯޓް ދޫކުރުމުގައި ދުނިޔޭގެ ހުރިހާ ހިސާބެއްގައިވެސް ޚާއްޞަ އުސޫލުތަކެއް ގެންގުޅެ އެވެ. އެހެންކަމުން، މިނިސްޓްރީއަށް މީގެ ކުރިން މިކަމުގެ މަޝްވަރާ ލިބިފައިވީ ނަމަވެސް، މި ކަމުގައި ވިސްނަންޖެހޭ ވަކި ކަންތައްތަކެއް ހުރި ކަމަށް މިނިސްޓަރު ފާހަގަކުރެއްވި އެވެ.
މިނިސްޓަރު އިތުރަށް ވިދާޅުވި ގޮތުގައި، ހުރިހާ ކައުންސިލަރުންނަށް ޑިޕްލޮމެޓިކް ޕާސްޕޯޓް ދިނުމަށް ގިނަ މީހުން ތާއީދު ނުކުރާކަން މީސްމީޑިއާގައި ފާހަގަކޮށްފައިވެ އެވެ. ނަމަވެސް، ކޮންމެ ފިކުރެއްގެ ބަޔަކަށް ވިޔަސް ސިޓީތަކުގެ މޭޔަރުންނަށް ޑިޕްލޮމެޓިކް ޕާސްޕޯޓް ލިބުމަކީ ޖާއިޒު ކަމެއް ކަމަށް ގަބޫލުކުރައްވާ ކަމަށް މިނިސްޓަރު ވިދާޅުވި އެވެ.
މިނިސްޓަރު މިސާލެއްގެ ގޮތުގައި ފާހަގަކުރެއްވީ، މިހާރުގެ ރައީސުލްޖުމްހޫރިއްޔާ އެއް އަހަރު ކުރިން މާލޭ ސިޓީގެ މޭޔަރަކަށް ހުންނެވި ކަމާއި، އެފަދަ މަޤާމެއްގައި ހުންނަވާ ބޭފުޅަކަށް އާންމު ޕާސްޕޯޓެއް ދިނުމަކީ އެކަށީގެންވާ ކަމެއް ނޫން ކަމަށެވެ.
މިއަހަރުގެ ޖުލައިގައި އާދަމް ޝަރީފް އެކްސްގައި ކުރެއްވި ޕޯސްޓެއްގައި ވަނީ ޖުލައި 8 ގައި އެލްޖީއޭގެ ބޯޑް ބައްދަލުވުމުގައި ސިޓީ ކައުންސިލުގެ މޭޔަރުންނާއި އަތޮޅު އަދި ރަށު ކައުންސިލްގެ ރައީސްއާއި މެންބަރުންނަށް ޑިޕްލޮމެޓިކް ޕާސްޕޯޓް ނުވަތަ އޮފިޝަލް ޕާސްޕޯޓް ދިނުމާ ދޭތެރޭ އިމިގްރޭޝަނާއި އެކު މަޝްވަރާ ކުރި ކަމަށް ހާމަކުރައްވާފަ އެވެ. މިގޮތަށް މަޝްވަރާކޮށްފައިވަނީ ކައުއުންސިލަރުންނަށް އޮފިޝަލް ނުވަތަ ޑިޕޮލޮމެޓިކް ޕާސްޕޯޓު ލިބޭނެގޮތެއް އޮތްތޯ ބެލުމަށް ތިނަދޫ ސިޓީކައުންސިލުން އެލްޖީއޭއަށް ހުށަހެޅުމާއި ގުޅިގެން ނެވެ.
މިނިސްޓަރު އާދަމް ޝަރީފް އޭރު ވިދާޅުވި ގޮތުގައި، ކައުންސިލަރުންނަށް ރަސްމީ ނުވަތަ ޑިޕްލޮމެޓިކް ޕާސްޕޯޓް ފޯރުކޮށްދިނުމުގެ ބޭނުމަކީ ކައުންސިލްތަކަކީ ވެސް އާންމުން އިންތިޚާބުކުރާ އޮފިޝަލުން ކަމުން، ކައުންސިލްތައް ބާރުވެރިކޮށް ޙައްޤު ޙައިސިއްޔަތު ދިނުމެވެ.
ޑިޕްލޮމެޓިކް ޕާސްޕޯޓް މިހާރު ދޫކުރަނީ ސަރުކާރުގެ ތިން ބާރުގެ އިސްވެރިންނާއި ސުޕްރީމް އަދި ހައިކޯޓުގެ ފަނޑިޔާރުންނާއި ދަށު ކޯޓުތަކުގެ އިސް ފަނޑިޔާރުންނާއި ވަޒީރުންނާއި ސްޓޭޓް މިނިސްޓަރުންނާއި އެ ފެންވަރުގެ އެހެން މަގާމުތަކުގެ އިތުރުން މިނިވަން މުއައްސަސާތަކުގެ މެންބަރުންނާއި މަޖިލީހުގެ މެންބަރުންނާއި ސެކިއުރިޓީއާއި ބެހޭ އިދާރާތަކުގެ އިސްވެރިންނާއި އެބޭފުޅުންގެ އަނބިން ނުވަތަ ފިރިންނާއި 18 އަހަރުން ދަށުގެ ދަރިންނަށެވެ.
މިނިސްޓަރު އާދަމް ޝަރީފް އުމަރު މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް
