ރައްޔިތުންގެ މަޖިލީހުގެ އޮފިސަރުންގެ ގޮތުގައި މިހާރު ތިއްބެވި ތިން މުވައްޒަފަކު އިތުރު ދައުރަކަށް އެ މަޤާމުތަކުގައި ބޭތިއްބުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
މި ތިން މަޤާމަށް އައްޔަންކޮށްފައިވަނީ އަމީން އާންމު ފާތިމަތު ނިއުޝާ އާއި، ކައުންސެލް ޖެނެރަލް ފާތިމަތު ފިލްޒާ އަދި ސާޖަންޓް އެޓް އާމްސް (ރިޓަޔަރޑް) ތޮލްހަތު ހަސަން އެވެ.
މަޖިލީހުގެ މިއަދުގެ ޖަލްސާގައި މި ތިން މަޤާމަށް ވަކިވަކިން ވޯޓަށް އެހުނެވެ. އަމީން އާންމުގެ މަޤާމަށް ފާތިމަތު ނިއުޝާ އައްޔަންކުރުމަށް ފާސްކޮށްފައިވަނީ 79 މެންބަރުންގެ އިއްތިފާޤުން ނެވެ. އަދި ކައުންސެލް ޖެނެރަލްގެ މަޤާމަށް ފާތިމަތު ފިލްޒާ އާއި ސާޖަންޓް އެޓް އާމްސްގެ މަޤާމަށް ތޮލްހަތު ހަސަން އައްޔަންކުރުމަށް ފާސްކޮށްފައިވަނީ 80 މެންބަރުންގެ އިއްތިފާޤުން ނެވެ.
މި ތިން މަޤާމަށް އައްޔަންކުރުމަށް ނިންމާފައިވަނީ ރައްޔިތުންގެ މަޖިލީހުގެ ގަވާއިދުގެ 16 ވަނަ މާއްދާގެ ދަށުންނެވެ.
މި ނިންމުމާއެކު، މި ތިން މުވައްޒަފުން އިތުރު ދައުރަކަށް މަޖިލީހުގެ އިސް މަޤާމުތަކުގައި ދެމިތިބުމަށް ވަނީ މަގުފަހިވެފަ އެވެ.
