ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ކ. ފުނަދޫގައި ގާއިމްކޮށްފައިވާ ފިއުލް ފާމް، އިންޑަސްޓްރިއަލް ޒޯން ތިލަފުށްޓަށް ބަދަލުކުރުމަށް ނިންމައިފި އެވެ.
ދައުލަތުގެ މީޑިއާގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓަރު އިބްރާހީމް ޝިމާދު ވިދާޅުވީ މި ބަދަލު ގެނައުމުން ތެލުގެ އަގު ހެޔޮވާނެ ކަމަށެވެ. އަދި މުސްތަޤުބަލުގައި ތެޔޮ އެކްސްޕޯޓް ކުރުމަށްވެސް ރޭވިފައިވާ ކަމަށް އޭނާ ވިދާޅުވި އެވެ. އޭނާ ވިދާޅުވި ގޮތުގައި ފުނަދޫއަކީ ވަރަށް ކުޑަ ރަށެއްކަމާއި، އެރަށުގައި ހުންނަނީ 5-6 ހެކްޓަރު ކަމަށެވެ. އެހެންކަމުން ފިއުލް ފާމެއް ބަހައްޓަން ފުނަދޫއަކީ އެކަށީގެންވާ ރަށެއް ނޫން ކަމަށް އޭނާ ވިދާޅުވި އެވެ.
”ޑިވެލޮޕްމެންޓަލް ޕޮޓެންޝަލްވެސް ވަރަށް ކުޑަ. މިހާރު އަޅުގަނޑުމެން މި ބޭނުންކުރާ ޓޭންކަރުވެސް އެއީ ފުނަދޫއާއި އަޅާބަލާއިރު ވަރަށް ބޮޑެތި އޮއިލް ޓޭންކަރެއް. ބޮޑެތި ވެސަލްތައް ކައިރިކުރަން ވަރަށް އުނދަގޫ,“ ޝިމާދު ވިދާޅުވި އެވެ.
ތިލަފުށީގައި ފިއުލް ފާމް ބިނާކުރުމުން، އިކޮނޮމިކް ސައިޒްގެ އުޅަނދުތައް ގެނެސްގެން ރަނގަޅު ބަނދަރަކާއެކު ތެލުގެ ވިޔަފާރި ފުޅާކުރެވޭނެ ކަމަށް ޝިމާދު ފާހަގަކުރެއްވި އެވެ. މީގެ އިތުރުން، އެފްއެސްއެމް ޝެޑް އިން ތެޔޮ ވިއްކާ ރޭޓަށް ރާއްޖޭގެ ކޮންމެވެސް އެއް އަތޮޅެއްގައި މަސްވެރިންނަށް ތެޔޮ ފޯރުކޮށްދިނުމަށް ސަރުކާރުން ރާވާފައިވާ ކަންވެސް އޭނާ ހާމަކުރެއްވި އެވެ.
މި ބަދަލާއެކު ތެލުގެ އަގު ހެޔޮވެ، ރާއްޖޭގެ އިޤްތިޞާދަށް ފައިދާވާނެ ކަމަށް ބެލެވެއެވެ. އަދި މުސްތަގުބަލުގައި ތެޔޮ އެކްސްޕޯޓް ކުރުމުގެ ފުރުޞަތު ހުޅުވިގެންދާނެ ކަމަށްވެސް އުންމީދު ކުރެވެއެވެ.
އެސްޓީއޯގެ އެމްޑީ އިބްރާހީމް ޝިމާދު ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)
