އެންޓި ކޮރަޕްޝަން ކޮމިޝަން (އޭސީސީ)ގެ ނައިބު ރައީސް އަބްދުލް ސަލާމާއި އެ ކޮމިޝަނުގެ މެންބަރު ތޯހާ މުހައްމަދު މަގާމުން ވަކި ކުރުމުގެ ކުރިން މަގާމުން އިސްތިއުފާ ދެއްވައިފި އެވެ.
ތޯހާ އާއި ސަލާމް މަގާމުން އިސްތިއުފާ ދެއްވީ މި ދެ ބޭފުޅުންނާއި އިތުރު ބަޔަކު މަގާމުތަކުން ވަކި ކުރުމަށް ރައްޔިތުންގެ މަޖިލީހުން ވޯޓު ނަގަން މިއަދުގެ ޖަލްސާއަށް ތާވަލުކޮށްފައިވަނިކޮށެވެ. މި މައްސަލަ މިއަދުގެ ޖަލްސާއަށް ތާވަލުކޮށްފައިވަނީ އިއްޔެ ބޭއްވުނު މިނިވަން މުއައްސަސާތަކާ ބެހޭ ކޮމިޓީގެ ސިއްރު ބައްދަލުވުމެއްގައި މި ބޭފުޅުން މަގާމުން ވަކި ކުރުމަށް ފާސް ކުރުމުންނެވެ.
އިއްޔެ ބޭއްވި މިނިވަން މުއައްސަސާތަކާ ބެހޭ ކޮމިޓީން މަގާމުން ވަކި ކުރުމަށް ނިންމާފައިވާ ބޭފުޅުންގެ ތެރޭގައި ހިމެނެނީ އޭސީސީގެ ނައިބު ރައީސް އަބްދުލް ސަލާމާއި މެންބަރު ތޯހާ މުހައްމަދާއި އީސީގެ ނައިބު ރައީސް އަލީ ނަޝާތާއި މެންބަރު މުހައްމަދު އާސިފާއި މެންބަރު ޑރ. މުހައްމަދު ޒާހިރު އެވެ. މީގެ އިތުރުން ސިވިލް ސާވިސް ކޮމިޝަންގެ ރައީސް މުހައްމަދު ނާސިހް ވަކިކުރުމަށް ހުށަހެޅި ނަމަވެސް އިއްޔެ ކުރިއަށް ގެންދިޔަ ކޮމިޓީ ބައްދަލުވުމުގައި ނާސިހް ވަކިކުރުމާ ގުޅޭ ގޮތުން ގޮތެއް ނުނިންމަ އެވެ.
އޭސީސީގެ މެންބަރުކަމުން އިސްތިއުފާ ދެއްވަމުން ސަލާމާއި ތޯހާ ފޮނުއްވި ސިޓީގައި އިސްތިއުފާ ދެއްވާ ސަބަބެއްކަމަށް ލިޔެފައިވަނީ އެންޓި ކޮރަޕްޝަން ކޮމިޝަންގެ ޒިންމާތައް މިނިވަންކަމާ އެކު އަދާކުރެވޭނެ މާހައުލެއް އޮތް ކަމަށް ފެންނަން ނެތުމުން ކަމަށެވެ. އަދި އެބޭފުޅުން ވަކިކުރަން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީން މަސައްކަތް ފެށީ މިނިވަންކަމާއި ނަޒާހަތްތެރިކަމާ އެކު އެބޭފުޅުންގެ ޒިންމާތައް އަދާކުރައްވަމުން ގެންދަވަނިކޮށް ދޮގު ތުހުމަތުތަކެއް އެޅުވުމަށް ފަހު ކަމަށްވެސް ބުނެފައިވެ އެވެ.
ސަލާމާއި ތޯހާ އޭސީސީގެ މެންބަރުކަމަށް އައްޔަންކުރެވުނީ މިދިޔަ ސަރުކާރުގެ ދައުރުގައި، 2022 ވަނަ އަހަރުގެ މާރިޗު 17 ވަނަ ދުވަހު އެވެ.
މި ދެ މެންބަރުންގެ އިސްތިއުފާއާ ގުޅިގެން، އޭސީސީގެ މެންބަރުންގެ ގޮތުގައި މިހާރު ތިއްބެވީ ރައީސް އާދަމް ޝާމިލް، ޝިޔާމާ މުހައްމަދު އަދި ޝަޒްނާ ހާޝިމް އެވެ.
ރައްޔިތުންގެ މަޖިލިސް އެންޓި ކޮރަޕްޝަން ކޮމިޝަން (އޭސީސީ) މިނިވަން މުއައްސަސާތަކާ ބެހޭ ކޮމިޓީ
