2025 ވަނަ އަހަރަށް ހުށަހަޅާފައިވާ ދައުލަތުގެ ބަޖެޓަކީ ދިވެހި ރައްޔިތުން އިޤްތިޞާދީގޮތުން ކުރިމަތިލާންޖެހިފައިވާ ބުރަ ބޮޑު ހާލަތުން ސަލާމަތްވެގެންދާނެ ބަޖެޓެއް ކަމަށް ރައްޔިތުންގެ މަޖިލީހުގެ މިލަންދޫ ދާއިރާގެ މެންބަރު ހަސަން މުފީދު އަބްދުލްޤާދިރު ވިދާޅުވެއްޖެ އެވެ.
މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި 2025 ވަނަ އަހަރަށް ލަފާކުރާ ދައުލަތުގެ ބަޖެޓަށް ބަހުސްކުރެވުނެވެ. މި ބަހުސްގައި ވާހަކަދައްކަވަމުން މެންބަރު މުފީދު ފާހަގަކުރެއްވީ، ޕާޓީ ފިކުރުގެ ތެރެއިން ވެރިކަން ކުރުމުގެ ފުރުސަތު އެންމެ ބޮޑަށް ލިބި، ނަތީޖާ ނެރެނުދެވިފައިވަނީ އެމްޑީޕީގެ ސަރުކާރުގައި ކަމަށެވެ.
”2025 ވަނަ އަހަރަށް ފާސްކުރެވިގެންދާ ބަޖެޓަކީ އެމްޑީޕީއިން ވެރިކަން ކުރި ދެ ދައުރުގައި ދިވެހި ރައްޔިތުން އިޤްތިޞާދީ ގޮތުން ކުޑަކަކޫމައްޗަށް ތިރިކޮށްފައިއޮތް ބުރަބޮޑުކަމުން ސަލާމަތްވެގެންދާނެ ކަމީ ޝައްކެއްއޮތް ކަމެއް ނޫން،“ މުފީދު ވިދާޅުވި އެވެ.
އެމްޑީޕީއަށް ނިސްބަތްވާ މެންބަރުން 2025 އަށް ހުށަހަޅާފައި އޮތް ބަޖެޓުގައި އެއްވެސް ކަމެއް ކުރުމަށް ބަޖެޓުކުރެވިފައި ނެތް ކަމަށް ވިދާޅުވަމުން ގެންދަވާ ވާހަކަތަކަކީ ކަނޑައެޅިގެން ފިތުނައިގެ ވިދާޅުވުންތަކެއް ކަމަށްވެސް މުފީދު ފާހަގަކުރެއްވި އެވެ. އަދި އެއީ މުޖުތަމަޢުގައި ފިތުނަފަސާދަ އުފެއްދުމަށާއި ރައްޔިތުންގެ ހިތުގައި ނަފުރަތު އުފެއްދުމަށްޓަކައި ދެކެވޭ ވާހަކަތަކެއް ކަމަށް އިތުރަށް ވިދާޅުވިއެ ވެ.
2025 ވަނަ އަހަރުގެ ބަޖެޓާ ގުޅޭގޮތުން މަޖިލީހުގައި ބަހުސް ކުރިއަށްދާއިރު، ސަރުކާރާއި އިދިކޮޅު ފަރާތްތަކުގެ މެދުގައި ޚިޔާލު ތަފާތުވުންތަކެއް ހުރިކަން ފާހަގަކުރެވެ އެވެ.
ރައްޔިތުންގެ މަޖިލިސް މިލަންދޫ ދާއިރާގެ މެންބަރު ޙަސަން މުފީދު އަބްދުލް ގާދިރު
