ތައިލެންޑުގައި ހުންނަވާ ދިވެހި ސަފީރުކަމުގެ މަގާމަށް އިލެކްޝަންސް ކޮމިޝަން (އީސީ)ގެ ކުރީގެ ރައީސް ފުއާދު ތައުފީގް ހަމަޖެއްސުމަށް ރައްޔިތުންގެ މަޖިލީހަށް ފޮނުވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ތައިލެންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު ކަމަށް ފުއާދު ހަމަޖެއްސެވުމަށްޓަކައި ރައީސް ފޮނުއްވާފައިވާ ސިޓީ އިއްވާފަ އެވެ.
މި މައްސަލަ ދިރާސާ ކުރުމަށް ވަނީ ހާރިޖީ ގުޅުންތަކުގެ ކޮމިޓީއަށް ފޮނުވާފަ އެވެ.
އީސީގައި ފުއާދުގެ ދައުރު ހަމަވީ މިދިޔަ ހޮނިހިރު ދުވަހު އެވެ. އީސީގެ މެންބަރު ކަމަށް ދެވަނަ ދައުރަކަށް ފުއާދު އައްޔަންކޮށްފައިވަނީ 24 ނޮވެމްބަރު 2019 ގަ އެވެ. އަދި އެކޮމިޝަންގެ ރައީސްގެ މަގާމަށް ފުއާދު އައްޔަނު ކޮށްފައިވަނީ 2021 ވަނަ އަހަރު އެވެ.
