ކައުންސިލުތައް ހިންގުމުގައި ސަރުކާރުން ދޭ ބަޖެޓްގެ އިތުރުން ކައުންސިލުތަކުން އަމިއްލައަށް އާމްދަނީ ހޯދުމަށް ސަރުކާރުން ހިތްވަރުދޭ ކަމަށް ލޯކަލް ގަވަމެންޓާ ބެހޭ ވަޒީރު އާދަމް ޝަރީފް ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ ”ޖަވިޔަނި“ އަށް ދެއްވި ޚާއްސަ އިންޓަވިއުއެއްގަ އެވެ.
މި އިންޓަވިއުގައި ވާހަކަދައްކަވަމުން މިނިސްޓަރ ވިދާޅުވީ ބިމުގެ އަގު ބޮޑެތި ރަށްރަށުގެ ކައުންސިލުތަކުން މިހާރުވެސް އަމިއްލަ ގޮތްގޮތުން އާމްދަނީ ހޯދަމުންދާ ކަމަށާއި، އެފަދަ ކައުންސިލުތަކުން އެ އާމްދަނީއިން ވަރަށް ރަނގަޅަށް ހިންގަމުން އަންނަ ކަމަށެވެ.
”ސަރުކާރުން ދޭ ބަޖެޓްގެ ތެރޭގައި ހުރިހާ ކަމެއް ކުރުމަށް އަޅުގަނޑުމެން ވަރަށް ބޮޑަށް ހިތްވަރުދޭ ކަމެކޭ. އަދި އެއާއެކީގައި އިތުރަށް އެ ރަށަކަށް އާމްދަނީ ކައުންސިލަށް ލިބޭނެ ގޮތްތައް ތަރުތީބުކޮށްގެން އެހެން ގެންދިއުމަކީވެސް އަޅުގަނޑުމެން އިތުރަށް އެދޭ ކަމެއް“ ކަމަށް މިނިސްޓަރ ވިދާޅުވިއެވެ.
ނަމަވެސް، އެފަދަ ފުރުސަތު ތަނަވަސް ނޫން ކައުންސިލުތަކަށް ސަރުކާރުން އިތުރަށް ޕަމްޕްކޮށްގެންވިޔަސް އެ ކައުންސިލުގެ ރައްޔިތުންނަށް ބޭނުންވާނެ އިތުރު ކަންކަން ފުރިހަމަ ކުރެވޭނެ ބަޖެޓް ކައުންސިލުތަކަށް ލިބެންޖެހޭނެ ކަމަށް ގަބޫލުކުރައްވާ ކަމަށް ވިދާޅުވި އެވެ.
ބޮޑެތި ޕީއެސްއައިޕީ މަޝްރޫއުތައް ފިޔަވައި ރަށެއްގެ ރައްޔިތުންނަށް ބޭނުންވާ ދެން ހުރި ކަންކަން އެ ރަށެއްގެ ކައުންސިލަށް ހަމަޖެހެން ޖެހޭނެ ކަމަށް ވަޒީރު ވިދާޅުވި އެވެ. އެހެންކަމުން، ރަށެއްގެ ކައުންސިލުގެ މުނިސިޕަލް ކަންކަމާއި ދެމެހެއްޓެނިވި ތަރައްގީއަށް ކުރެވޭ މަޝްރޫއުތައް ހިންގުމުގައި ކައުންސިލުތަކަށް ލިބޭ އާމްދަނީއިން ކައުންސިލުތައް ބާރުވެރިވެގެން ކައުންސިލުތަކުގެ މިނިވަންކަމާއި މުސްތަގިއްލުކަން ފެނިގެންދިއުމަކީ އުންމީދެއް ކަމަށް މިނިސްޓަރ ވިދާޅުވި އެވެ.
މީގެ އިތުރުން، ކައުންސިލުތަކުގެ ރައްޔިތުންނަށް ބޭނުންވާ ޚިދުމަތް ލިބުމުގައި ބަޖެޓް ކައުންސިލުތަކަށް ލިބެންވާނެ ކަމަށާއި އެއީ ކޮންމެހެން ސަރުކާރުން ދޭ ބަޖެޓަކަށް ވާކަށް ލާޒިމް ނުވާ ކަމަށް ދެކިވަޑައިގަންނަވާ ކަމަށް މިނިސްޓަރ ވިދާޅުވި އެވެ.
”އެ ރަށަކަށް އާމްދަނީ ލިބޭ ގޮތްތައް ހޯއްދަވައިގެންވިޔަސް އާމްދަނީ ލިބިގެން، ސަރުކާރަށް ނުދަންނަވާ އެ ރަށަކުން ބޭނުންވާ ކަމެއް އެ ރަށަކުން ވުން އެއީ އަޅުގަނޑު ދެކެން ބޭނުންވާ ކަމެއް. މާލީ ބާރުވެރިކަން ހޯއްދަވައިދެއްވުން އެއީ ރައީސުލްޖުމްހޫރިއްޔާގެ ތަސައްވުރަކީވެސް“ ކަމަށް މިނިސްޓަރ ވިދާޅުވި އެވެ.
މި މޭރުމުން ވާހަކަދައްކަވަމުން ވަޒީރު ވިދާޅުވީ އާމްދަނީ ހޯދުމަށް ކައުންސިލުތަކުން އިސްނަގައިގެން އާމްދަނީ ލިބޭނެ ގޮތްތައްވެސް ސަރުކާރަށް ބަރޯސާނުވެ، ހޯދުމުގެ ވިސްނުމުގައި މަސައްކަތް ތަރުތީބު ކުރަން ޖެހޭ ކަމަށެވެ.
މި ފަހަރުގެ ބަޖެޓް ފާސްވާއިރުގައިވެސް ގާނޫނުގައި އޮތް ގޮތަށް ބްލޮކް ގްރާންޓުގެ ގޮތުގައި ފަސް އިންސައްތަ ކައުންސިލްތަކަށް ލިބޭނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވާ ކަމަށް މިނިސްޓަރ ފާހަގަކުރެއްވި އެވެ.
އެގޮތުން ކައުންސިލްތަކަށް ލިބޭ އާމްދަނީ އިތުރުކުރުމަށް ކައުންސިލްތަކަށް ފަޅުރަށްތައް ލިބޭނެ މަގުފަހިކޮށްދެއްވުމާއި، ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލްތަކަށް ޖަމާކޮށްދިނުމަށް ނިންމަވާފައިވާކަން ރައީސުލްޖުމްހޫރިއްޔާ ފާހަގަކުރެއްވި ކަމަށްވެސް މިނިސްޓަރ ވިދާޅުވި އެވެ.
މީގެ އިތުރުން، ބްލޮކް ގްރާންޓުގެ 5 އިންސައްތައިގެ އިތުރަށް ލޯކަލް ޓޫރިޒަމްގެ ތެރެއިން ލިބޭ ޓެކްސްގެ ވަކި އިންސައްތައެއް ކައުންސިލުތަކަށް ލިބޭގޮތް ހެދުމަށް ޤާނޫނަށް އިސްލާހު ގެނައުމަށް ފޮނުއްވާނެ ކަމުގައި ރައީސުލްޖުމްހޫރިއްޔާ ވިދާޅުވެފައިވާ ކަމަށްވެސް މިނިސްޓަރ އާދަމް ޝަރީފް ވިދާޅުވި އެވެ.
މިނިސްޓަރު އާދަމް ޝަރީފް އުމަރު މިނިސްޓްރީ އޮފް ސިޓީސް، ލޯކަލް ގަވަރންމަންޓް އެންޑް ޕަބްލިކް ވާރކްސް
