ވެރިކަން ކުރާ ޕާޓީ، ކޮންގްރެސް ޕާޓީ (ޕީއެންސީ) ގެ އެތެރޭގެ އިންތިހާބު ކާމިޔާބު ކުރެއްވި ހުރިހާ ބޭފުޅުންނަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަރުހަބާ ދަންނަވައިފި އެވެ.

ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވަނީ އިންތިހާބު ކާމިޔާބު ކުރެއްވި ކެންޑިޑޭޓުންނަށް މަރުހަބާ ވިދާޅުވެ އެކި މަގާމުތަކަށް ވާދަކުރެއްވި ކެންޑިޑޭޓުންނާއި އިންތިހާބުގެ އިންތިޒާމުތަކުގައި އުޅުއްވި ހުރިހާ ބޭފުޅުންނަށް ޝުކުރު އަދާ ކުރައްވާފަ އެވެ.

އަދި މި އިންތިހާބުގައި ވޯޓު ދެއްވި ހުރިހާ މެމްބަރުންނަށް ވެސް ރައީސް މުއިއްޒު ޝުކުރު ދެންނެވި އެވެ.

މި އިންތިހާބުގެ ވޯޓުލުން ކުރިއަށްދިޔައީ މާލެ އާއި އަތޮޅުތެރޭގެ 88 ރަށެއްގައި ކަމަށް ޕީއެންސީން ބުނެ އެވެ.

ޕީއެންސީން މައުލޫމާތު ދޭ ގޮތުގައި، މި އިންތިހާބުގައި ވޯޓުލުމުގެ ހައްގު ލިބިފައިވަނީ 33،500 މީހުންނަށެވެ. ވޯޓުލުން ކުރިއަށް ދިޔައީ މިއަދުގެ މެންދުރުފަހު 2:00 އާ ހަމައަށެވެ.

މާލެ އާއި އަތޮޅުތެރޭގައި ޖުމްލަ 144 ވޯޓުފޮށި ބަހައްޓާފައިވެ އެވެ. މި އިންތިހާބު ފުރަތަމަ ބޭއްވުމަށް ތާވަލުކޮށްފައިވަނީ އޮކްޓޫބަރު 19 ގަ އެވެ. ނަމަވެސް އޭގެފަހުން ނޮވެމްބަރު 9 އަށް އިންތިހާބު ފަސްކުރުމަށްފަހު، އަނެއްކާވެސް މިއަދަށް އިންތިހާބު ފަސްކުރި އެވެ.

ޕީއެންސީގެ އެތެރޭގެ އިންތިހާބަށް ކުރިމަތިލި ކެންޑިޑޭޓުންގެ ލިސްޓު ނޮވެމްބަރު 13 ގައި އިއުލާނުކޮށްފައިވެ އެވެ.

މި އިންތިހާބަކީ ޕާޓީގެ އެތެރޭގެ ކަންކަން ހަރުދަނާކޮށް، ޕާޓީގެ އޮނިގަނޑު ވަރުގަދަކުރުމަށް ބާއްވާ މުހިންމު އިންތިހާބެކެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކޮންގްރެސް ޕާޓީ