ވެރިކަން ކުރާ ޕާޓީ، ކޮންގްރެސް ޕާޓީ (ޕީއެންސީ) ގެ އެތެރޭގެ އިންތިހާބުގެ ވޯޓުލުން މިއަދު ހެނދުނު ފަށައިފި އެވެ.
މި އިންތިހާބުގެ ވޯޓުލުން ކުރިއަށްދަނީ މާލެ އާއި އަތޮޅުތެރޭގެ 88 ރަށެއްގައި ކަމަށް ޕީއެންސީން ބުނެ އެވެ.
ޕީއެންސީން މައުލޫމާތު ދޭ ގޮތުގައި، މި އިންތިހާބުގައި ވޯޓުލުމުގެ ހައްގު ލިބިފައިވަނީ 33،500 މީހުންނަށެވެ. އަދި މި އިންތިހާބުގައި 1،984 މަގާމަކަށް މީހުން އައްޔަނު ކުރުމަށް ވަނީ ނިންމާފަ އެވެ. ވޯޓުލުން ކުރިއަށް ދާނީ މިއަދުގެ މެންދުރުފަހު 2:00 އާ ހަމައަށެވެ.
މާލެ އާއި އަތޮޅުތެރޭގައި ޖުމްލަ 144 ވޯޓުފޮށި ބަހައްޓާފައިވާކަމަށް ޕީއެންސީން ބުނެ އެވެ. މި އިންތިހާބު ފުރަތަމަ ބޭއްވުމަށް ތާވަލުކޮށްފައިވަނީ އޮކްޓޫބަރު 19 ގަ އެވެ. ނަމަވެސް އޭގެފަހުން ނޮވެމްބަރު 9 އަށް އިންތިހާބު ފަސްކުރުމަށްފަހު، އަނެއްކާވެސް މިއަދަށް އިންތިހާބު ފަސްކުރި އެވެ.
ޕީއެންސީގެ އެތެރޭގެ އިންތިހާބަށް ކުރިމަތިލި ކެންޑިޑޭޓުންގެ ލިސްޓު ނޮވެމްބަރު 13 ގައި އިއުލާނުކޮށްފައިވެ އެވެ.
މި އިންތިހާބަކީ ޕާޓީގެ އެތެރޭގެ ކަންކަން ހަރުދަނާކޮށް، ޕާޓީގެ އޮނިގަނޑު ވަރުގަދަކުރުމަށް ބާއްވާ މުހިންމު އިންތިހާބެކެވެ.
