ކުޑަކުއްޖަކަށް ޖިންސީ ގޯނާކުރި މައްސަލައެއްގައި ހުކުމް ތަންފީޒުކުރަމުންދާ ހާޝިމް އަބޫބަކުރު ގޭ ބަންދަށް ބަދަލުކުރީ ޑޮކްޓަރު ދީފައިވާ އިރުޝާދާ އެއްގޮތަށް ޖަލުގައި ފަރުވާ ނުދެވޭތީ ބޭސްފަރުވާ އަށް ކަމަށް މޯލްޑިވްސް ކަރެކްޝަނަލް ސާވިސްއިން ބުނެފި އެވެ.
ކުޑަކުއްޖަކާ އެކު ޖިންސީ އަމަލެއް ހިންގި މައްސަލައެއްގައި ހއ. ހޯރަފުށީ ހާޝިމް 12 އަހަރަށް ޖަލަށް ލާން ހުކުމް ކުރީ ނޮވެމްބަރު 11، 2022 ގަ އެވެ.
ކަރެކްޝަންއިން އިއްޔެ ނެރުނު ބަޔާނެއްގައި ބުނެފައިވަނީ، ހާޝިމަކީ 2022 ވަނަ އަހަރުން ފެށިގެން އުނަގަނޑުގެ މައްސަލައެއް ހުރެ އެ ވޭން ތަހައްމަލު ކުރަމުންދާ މީހެއް ކަމަށެވެ. އެގޮތުން އެކަމުގައި އޭނާއަށް ދޭންޖެހޭ ސިއްހީ ފަރުވާ ޖަލުގައި ބަހައްޓައިގެން ދެވެން ނެތް ކަމަށެވެ.
2022 ނޮވެމްބަރު 20 ގައި ޖަލަށް ލުމަށް ޙުކުމް ކޮށްފައިވާ ޙާޝިމްގެ ބައްޔަށް ޖަލުގައި ފަރުވާ ކުރަމުން ދިޔަ ނަމަވެސް ސާޖަރީއެއް ކުރަން ރާއްޖެއިން ބޭރަށް ދިއުމަށް ޑޮކްޓަރުން ލަފާ ދިނުމާއެކު އޭނާއަށް ރާއްޖެއިން ބޭރަށް ބޭސް ފަރުވާ އަށް ދިއުމަށް ހުއްދަ މީގެ ކުރިން ދީފައިވާ ކަމަށްވެސް ކަރެކްޝަންސް އިން ބުނެފައިވެ އެވެ.
އެހެންކަމުން މިއަހަރުގެ އޮގަސްޓް މަހުގެ 5 ވަނަ ދުވަހު ބޭރަށްގޮސް ފަރުވާ ހޯދުމަށްފަހު ސެޕްޓެމްބަރު މަހުގެ 16 ވަނަ ދުވަހު މާލެ އައި ކަމަށްވެސް ކަރެކްޝަންސް އިން ބުނެފައިވެ އެވެ.
މީގެ އިތުރުން، އޭނާގެ ބަލި ހާލަތު ހުރިގޮތުން ޑޮކްޓަރުން ދީފައިވާ އިރުޝާދާ އެއްގޮތަށް ޖަލުގައި ބަހައްޓައިގެން ފަރުވާ ދެވެން ނެތް ކަމަށާއި، އޭނާ ވަނީ ހުކުމް ތަންފީޒު ކުރުމަށް ވަގުތީ ގޮތުން ގޭ ބަންދުގައި ބަހައްޓާފައި ކަމަށްވެސް ކަރެކްޝަންސް އިންބުނެ އެވެ، އަދި އޮންނަ އުސޫލާ އެއްގޮތަށް ހާޝިމްގެ ކަންތައްތައް މޮނިޓާ ކޮށް ބަލަމުންދާ ކަމަށްވެސް ކަރެކްޝަނުން ބުނެފައިވެ އެވެ.
