ކ. ގުޅިން މިމަހުގެ ތެރޭގައި ފާނަބަސަންދުގެ 11 ކޭހެއް ރިޕޯޓުކޮށްފައިވާކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.
އެޗްޕީއޭއިން އެކްސް ގައި ކުރި ޕޯސްޓެއްގައި ބުނެފައިވަނީ މިއަހަރުގެ ނޮވެންބަރު މަހާ ހަމައަށް މުޅި ރާއްޖެއިން ފާނަބަސަންދުގެ ޖުމުލަ 2،977 ކޭހެއް ރިޕޯޓުކޮށްފައިވާ ކަމަށެވެ. މީގެ ތެރޭގައި ހިމެނެނީ މާލެ ސަރަހައްދުން ރިޕޯޓު ކުރި 1،506 ކޭހަކާއި އަތޮޅުތަކުން ރިޕޯޓު ކުރި 1،471 ކޭހެކެވެ.
ފާނަބަސަންދަކީ ވައިރަހަކުން ޖެހޭ ބައްޔެއްކެވެ. މި ބަލި އާންމުކޮށް ޖެހެނީ ކުޑަކުދިންނަށް ކަމުގައިވިޔަސް، ބޮޑެތި މީހުންނަށްވެސް މި ބަލި ޖެހެ އެވެ. މި ބަލީގެ އަލާމާތްތަކުގެ ތެރޭގައި ހުން އައުމާއި، ވަރުދެރަވުމާއި، ނޭފަތުން ފެން އައުމާއި، އަދި ހަމުގައި ބިހިތަކެއް ނެގުން ހިމެނެއެވެ.
ފާނަބަސަންދު ފެތުރެނީ މައިގަނޑު ގޮތެއްގައި ދެ ގޮތަކަށެވެ. އެއީ ބަލި ޖެހިފައިވާ މީހަކު ކެއްސުމުން ނުވަތަ ކިނބިހި އެޅުމުން ނޭވާލާ ނިޒާމުގެ ޒަރީއާއިންނާއި، ބިހިނަގާފައިވާ މީހެއްގެ ގައިގައި ބީހުމުން ނުވަތަ އެފަދަ މީހަކު ބޭނުންކޮށްފައިވާ ތުވާލި ނުވަތަ އަންނައުނު ފަދަ ތަކެތި ބޭނުންކުރުމުންނެވެ.
ކުރިން ފާނަބަސަންދު ނުޖެހޭ ކޮންމެ މީހަކީ މި ބަލި ޖެހިދާނެ މީހެކެވެ. ނަމަވެސް، އެއްފަހަރު މި ބަލި ޖެހުމަށްފަހު ދެވަނަ ފަހަރަށް މި ބަލި ޖެހުމުގެ ފުރުސަތު ކުޑަކަމަށް ބެލެވެއެވެ.
ފާނަބަސަންދުގެ ކޭސްތައް އާންމުކޮށް ރާއްޖޭގެ އެކި ހިސާބުތަކުން ކޮންމެ އަހަރަކުވެސް ރިޕޯޓްކުރެވޭކަމަށް އެޗްޕީއޭ އިން ބުނެ އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) މިނިސްޓްރީ އޮފް ހެލްތް
