ހައުސިން މިނިސްޓްރީގެ ފަރާތުން އައިކޮމްއަށް ނުދިއުން ފަދަ ކަންކަން ތަކުރާރުވިޔަ ނުދޭން އުސޫލުތައް ހަރުދަނާކުރާނެ ކަމަށް ހައުސިން މިނިސްޓްރީ އިން ބުނެފި އެވެ.
ހައުސިން މިނިސްޓްރީ އިން އިއްޔެ ނެރުނު ބަޔާނެއްގައި މިގޮތަށް ބުނީ ނޮވެމްބަރު މަހުގެ ހަތް ވަނަ ދުވަހު އޮތް އިންފޮމޭޝަން ކޮމިޝަން އޮފީސް (އައިކޮމް)ގައި އޮތް އަޑުއެހުމަކަށް އެ ވުޒާރާގެ ފަރާތުން ނުދެވުމުގެ ސަބަބުން އައިކޮމް އިން އެ ވުޒާރާ ޖޫރިމަނާކޮށްފައި އޮތުމާއި ގުޅިގެން ނެވެ.
މިކަމާއި ގުޅިގެން ނެރުނު ނޫސް ބަޔާނެއްގައި ހައުސިން މިނިސްޓްރީ އިން ބުނީ އެ ވުޒާރާގެ ހުރިހާ ކަންކަން ހާމަކަން ބޮޑު ގޮތެއްގައި އަދި ޖަވާބުދާރީކުރުވަނިވި ގޮތެއްގައި ކުރިއަށް ގެންދިއުމަށް، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ހޯދުމަށް އެދި އެ ވުޒާރާއަށް ހުށަހަޅާފައިވާ ހުށަހެޅުންތަކާއި ގުޅިގެން އެ ވުޒާރާގެ މައުލޫމާތުތައް، ކަނޑައެޅިފައިވާ މުއްދަތުތަކުގައި ފޯރުކޮށްދިނުމަކީ އެ ވުޒާރާއިން ވަރަށް ބޮޑަށް އިސްކަން ދޭ ކަމެއް ކަމަށެވެ.
”އެހެންކަމުން އެ މުވައްޒަފާ ދޭތެރޭގައި ސިވިލް ސާވިސް ގަވާއިދުގައިވާ ގޮތުގެ މަތިން ފިޔަވަޅު އެޅުމުގެ ކަންކަން ކުރިއަށް ގެންދެވިފައިވާ ވާހަކަ ދަންނަވަމެވެ،“. އެ ބަޔާނުގައި ވެއެވެ.
މީގެ އިތުރަށްވެސް، މިފަދަ ކަންކަން ތަކުރާރުވިޔަ ނުދިނުމަށް ކަމާއި ގުޅޭ އުސޫލުތައް ހަރުދަނާ ކުރުމުގެ މަސައްކަތް އެ ވުޒާރާއިން ކުރަމުންދާ ކަަމަށްވެސް އެ ބަޔާނުގައި ފާހަގަކޮށްފައި ވެއެވެ.
އައިކޮމް އިން ބުނީ މައުލޫމާތު ހޯދުމުގެ ހައްގުގެ ގާނޫނުގެ ދަށުން ހައުސިން މިނިސްޓްރީން މައުލޫމާތު ހޯދުމަށް އާންމު މީހަކު އެދިފައިވާ ކަމަށެވެ. އެކަމަށް ހައުސިން މިނިސްޓްރީން ޖަވާބެއް ނުދިނުމުން އެ މައްސަލަ އައިކޮމްއަށް ހުށަހަޅާފައިވެ އެވެ.
އައިކޮމް އިން ބުނީ މި މައްސަލައާ ގުޅޭ އަޑުއެހުމެއް މިމަހުގެ ހަތް ވަނަ ދުވަހު ބާއްވަން ތާވަލުކުރި ކަމަށާއި، އެކަން ހައުސިން މިނިސްޓްރީއަށް އަންގާފައިވާ ކަމަށެވެ. ނަމަވެސް ހައުސިން މިނިސްޓްރީން އައިކޮމްގެ އަޑުއެހުމަށް ހާޒިރުވެފައެއް ނުވެ އެވެ.
އައިކޮމް އިން ބުނީ މައުލޫމާތު ހޯދުމުގެ ހައްގުގެ ގަވާއިދުގައިވާ ގޮތުން ސައްހަ ސަބަބަކާ ހުރެ އަޑުއެހުމަކަށް ހާޒިރު ނުވެވޭނަމަ މިކަން އަންގަން ޖެހޭނީ ބައްދަލުވުން ފެށުމަށް ހަމަޖެހިފައިވާ ގަޑީގެ މަދުވެގެން އެއްގަޑިއިރު ކުރިން ކަމަށެވެ.
ނަމަވެސް ގަވާއިދާ އެއްގޮތަށް ހާޒިރުނުވެވުުނު ސަބަބު ހައުސިން މިނިސްޓްރީން އަންގާފައި ނުވާތީ އައިކޮމް އިން ބުނީ 350 ރުފިޔާއިން ހައުސިން މިނިސްޓްރީ ޖޫރިމަނާކޮށްފައިވާ ކަމަށެވެ.
މިއީ އަޑުއެހުމަކަށް ހާޒިރުނުވުމުން އައިކޮމް އިން މިފަދަ ފިޔަވަޅެއް އަޅާ ފުރަތަމަ ފަހަރެވެ.
ހައުސިން މިނިސްޓްރީ އިންފޮމޭޝަން ކޮމިޝަނަރުގެ އޮފީސް (އައިކޮމް)
