އިންފޮމޭޝަން ކޮމިޝަނަރުގެ އޮފީސް (އައިކޮމް) އިން ފުރަތަމަ ފަހަރަށް އަޑުއެހުމަކަށް ހާޒިރުނުވި މިނިސްޓްރީއެއް ޖޫރިމަނާކޮށްފި އެވެ.
އައިކޮމް އިން ބުނީ މައުލޫމާތު ހޯދުމުގެ ހައްގުގެ ގާނޫނުގެ ދަށުން ހައުސިން މިނިސްޓްރީން މައުލޫމާތު ހޯދުމަށް އާންމު މީހަކު އެދިފައިވާ ކަމަށެވެ. އެކަމަށް ހައުސިން މިނިސްޓްރީން ޖަވާބެއް ނުދިނުމުން އެ މައްސަލަ އައިކޮމްއަށް ހުށަހަޅާފައިވެ އެވެ.
އައިކޮމް އިން ބުނީ މި މައްސަލައާ ގުޅޭ އަޑުއެހުމެއް މިމަހުގެ ހަތް ވަނަ ދުވަހު ބާއްވަން ތާވަލުކުރި ކަމަށާއި، އެކަން ހައުސިން މިނިސްޓްރީއަށް އަންގާފައިވާ ކަމަށެވެ. ނަމަވެސް ހައުސިން މިނިސްޓްރީން އައިކޮމްގެ އަޑުއެހުމަށް ހާޒިރުވެފައެއް ނުވެ އެވެ.
އައިކޮމް އިން ބުނީ މައުލޫމާތު ހޯދުމުގެ ހައްގުގެ ގަވާއިދުގައިވާ ގޮތުން ސައްހަ ސަބަބަކާ ހުރެ އަޑުއެހުމަކަށް ހާޒިރު ނުވެވޭނަމަ މިކަން އަންގަން ޖެހޭނީ ބައްދަލުވުން ފެށުމަށް ހަމަޖެހިފައިވާ ގަޑީގެ މަދުވެގެން އެއްގަޑިއިރު ކުރިން ކަމަށެވެ.
ނަމަވެސް ގަވާއިދާ އެއްގޮތަށް ހާޒިރުނުވެވުުނު ސަބަބު ހައުސިން މިނިސްޓްރީން އަންގާފައި ނުވާތީ އައިކޮމް އިން ބުނީ 350 ރުފިޔާއިން ހައުސިން މިނިސްޓްރީ ޖޫރިމަނާކޮށްފައިވާ ކަމަށެވެ.
މިއީ އަޑުއެހުމަކަށް ހާޒިރުނުވުމުން އައިކޮމް އިން މިފަދަ ފިޔަވަޅެއް އަޅާ ފުރަތަމަ ފަހަރެވެ.
ހައުސިން މިނިސްޓްރީ އިންފޮމޭޝަން ކޮމިޝަނަރުގެ އޮފީސް (އައިކޮމް)
