ކުރީގެ ރައީސް އަބްދުﷲ ޔާމީންގެ މައްޗަށް އިއްވި ޖަލު ހުކުމް ހައިކޯޓުން ބާތިލު ކުރި މައްސަލައިގައި ދައުލަތުން ސުޕްރީމް ކޯޓުގައި އިސްތިއުނާފު ކުރި ބައިގެ އަޑު އެހުންތައް އެ ކޯޓުގައި މިއަދު ފަށައިފި އެވެ.
ވ. އާރަށުގެ މައްސަލައިގައި އަބްދުﷲ ޔާމީން އަދި ޔޫސުފް ނައީމްގެ މައްޗަށް އިއްވި ޖަލު ހުކުމް ހައިކޯޓުން ބާތިލުކުރުމަށްފަހު، އެ މައްސަލަ އަލުން ބެލުމަށް ކްރިމިނަލް ކޯޓަށް ފޮނުވާފައިވެ އެވެ. ހައިކޯޓުން ނިންމި ނިންމުމުގައި، މައްސަލަ އަލުން ބަލާއިރު ބައެއް ހެކިތައް އެއްފަރާތްކުރުމަށް އަންގާފައިވަނީ، އެ ހެކިތައް ދަށު ކޯޓަށް ބަލައިގަތުމުގެ އިޖުރާއަތް ރަނގަޅުނޫންކަމަށް ބަޔާންކޮށެވެ.
ސުޕްރީމް ކޯޓުގެ އަޑުއެހުމުގައި، ޕްރޮސިކިއުޓަރ ޖެނެރަލްގެ އޮފީހުގެ ވަކީލު އަހުމަދު ޝަފީއު ވިދާޅުވީ ހައިކޯޓުގެ ނިންމުމަކީ ސުޕްރީމް ކޯޓުން މީގެކުރިން ކަނޑައަޅާފައިވާ ނިންމުމަކާ ޚިލާފު ނިންމުމެއް ކަމަށެވެ. އަދި ދައުލަތުގެ ވަކީލު ވިދާޅުވީ މައްސަލައިގައި އާ ހެކި އެއްފަރާތް ކުރަން ހައި ކޯޓުން އަންގާފައިވާއިރު، އެކަމުގައި ހިނގާފައިވަނީ އިޖުރާއީ މައްސަލައެއް ކަމަށާއި އެއީ އިސްލާހު ކުރެވެން އޮތް ކަމެއް ކަމަށެވެ.
އެހެންކަމުން ދައުލަތުން ސުޕްރީމް ކޯޓުގައި އެދިފައިވަނީ އެ ހެކިތަކާ ގުޅިގެން ދެ ފަރާތުން ޝަރީއަތުގައި ބަހުސްކުރުމުގެ ފުރުސަތުދީ، އެ ހެކިތައް ބަލައިގަތުމާ މެދު އަލުން ގޮތެއް ކަނޑައެޅުމަށް ދަށު ކޯޓަށް އަންގައިދިނުމަށެވެ.
މިމައްސަލައިގައި ޔާމީންގެ ވަކީލް ސުޕްރީމް ކޯޓުގައި ވިދާޅުވީ ދައުލަތުން ހުށަހެޅި އިސްތިއުނާފީ ނުކުތާއަކީ ސުޕްރީމް ކޯޓުން މީގެ ކުރިން ކަނޑައަޅާފައިވާ އުސޫލުތަކާ ހިލާފު ނުކުތާއެއް ކަމަށެވެ. އަދި ހައިކޯޓުގެ ނިންމުމަށް ބަދަލުގެންނަންޖެހޭތަނެއް ނެތްކަމަށް ކަނޑައަޅައި ދިނުމަށްވެސް އެދިފައިވެ އެވެ.
ދެފަރާތަކުގެ ވާހަކަތައް އަޑުއެއްސެވުމަށްފަހު މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު އާއިޝާ ޝުޖޫން މުހައްމަދު ވިދާޅުވީ މި މައްސަލައިގައި ދެން އޮންނަ އަޑުއެހުން އޮންނާނީ ރިސެސަށް ފަހު އަންނަ ޖެނުއަރީމަހު ކަމަށެވެ. އަދި މައްސަލައިގައި ދެ ފަރާތުން ނިންމުމުގެ ގޮތުން ވާހަކަ ދެއްކުމަށް ފުރުސަތު ދެއްވާނެ ކަމަށެވެ.
ސުޕްރީމް ކޯޓުގައި މި މައްސަލަ ބައްލަވާ ބެންޗުގައި ހިމެނިވަޑައިގަންނަވަނީ ފަނޑިޔާރު އާއިޝާ ޝުޖޫން މުހައްމަދު، ފަނޑިޔާރު ޑރ. އަޒްމިރާލްދާ ޒާހިރު އަދި ފަނޑިޔާރު ޑރ. މުހައްމަދު އިބްރާހީމް އެވެ.
ރައީސް އަބްދުﷲ ޔާމީން ސުޕްރީމް ކޯޓު ޕްރޮސެކިއުޓަ ޖެނެރަލްގެ އޮފީސް (ޕީޖީ އޮފީސް)
