ދާއިރާގެ ރައްޔިތުން އިންތިހާބުކުރި ރައްޔިތުންގެ މަޖިލީހުގެ މެންބަރަކު އެހެން ޕާޓީއަކަށް ބަދަލުވުމުން އެމީހެއްގެ ގޮނޑި ގެއްލޭ ގޮތަށް ގާނޫނު އަސާސީ އިސްލާހު ގެންނަން ނިންމައި އެކަމާ ގުޅޭ ބިލް މަޖިލިހަށް ވެއްދުމަށް ވެރިކަން ކުރާ ޕީއެންސީން މަސައްކަތް ފަށައިފި އެވެ.
މަޖިލިސް މެމްބަރުން އެހެން ޕާޓީއަކަށް ބަދަލުވެއްޖެ ނަމަ، ގޮނޑި ގެއްލޭނެ ކަމަށް ކަނޑައަޅައި އެންޓި ޑިފެކްޝަން ގާނޫނެއް މީގެ ކުރިންވެސް އޮވެއެެވެ. ގާނޫނުގައި ބުނެފައި ވަނީ ގާނޫނު ހަދާ މަޖިލީހުގެ މެންބަރުން ޕާޓީ ބަދަލު ކޮށްފިނަމަ އިސްތިއުފާ ދޭން ޖެހޭނެ ކަމަށެވެ. ނަމަވެސް އެމީހުން އިސްތިއުފާ ދިނުމަށް ދެކޮޅު ހަދައިފި ނަމަ ފިޔަވަޅު އަޅާނެ ގޮތެއް ކަނޑައަޅާފައި ނުވެ އެވެ.
މިކަމާއި ގުޅުންހުރި ނިންމުމެއް މިއަދު ނެގުމަށް ހަމަޖެހިފައިވެ އެވެ.
ގާނޫނު ހަދާ މަޖިލީހުގެ މެމްބަރުންގެ ގޮނޑި ގެއްލޭނީ ތިން ހާލަތެއްގަ އެވެ.
* އެމީހުންގެ ފަރާތުން ހޮވޭ ޕާޓީން އިސްތިއުފާދީފިނަމަ
* އެމީހުންގެ ފަރާތުން އިންތިހާބުވި ޕާޓީ ނޫން އެހެން ޕާޓީއެއްގައި ރަޖިސްޓްރީވާނަމަ
* އަމިއްލަ މެންބަރަކު ސިޔާސީ ޕާޓީއަކާ ސޮއިކޮށްފިނަމަ
އަދި ހުސްވެފައިވާ ގޮނޑިތައް ފުރުމަށް ބައިއިލެކްޝަންތައް ބާއްވަން ޖެހޭ ކަމަށް ވެސް ކަނޑައަޅާފައިވާއިރު، އެ ގޮނޑިތައް ގެއްލޭ ގާނޫނު ހަދާ މަޖިލީހުގެ މެންބަރުންނަށް ވެސް ވާދަކުރެވޭނެ އެވެ.
ރައްޔިތުންގެ މަޖިލީހުން އެންޓި ޑިފެކްޝަން ގާނޫނު ފާސްކޮށްފައި ވަނީ މީގެ ކުރިން 2018 ވަނަ އަހަރެވެ. އޭރުގެ ވެރިކަން ކުރާ ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ވަކިވި ދިހަވަރަކަށް ގާނޫނު ހަދާ މަޖިލީހުގެ މެންބަރުންގެ ގޮނޑިތަކާއި ގުޅޭގޮތުން ކުރި ހުކުމުގައި ވަނީ އެންޓި ޑިފެކްޝަން ގާނޫނު ހަދާ މަޖިލިސް އެކުލަވާލުމަށް ގޮވާލާފަ އެވެ.
ޕީޕީއެމްގެ އޭރުގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާން ހުސެއިން މަނިކު ހުށަހެޅުއްވި އެ ބިލް 2018 ވަނަ އަހަރުގެ މާޗް މަހު ހުށަހެޅުއްވި ނަމަވެސް އެ ބިލް ވަނީ 2018 ވަނަ އަހަރުގެ ނޮވެމްބަރު މަހު ބާތިލްކޮށްފަ އެވެ.
މިހާރު އަމަލުކުރަމުންދާ އެންޓި ޑިފެކްޝަން ގާނޫނު މި އަހަރުގެ ކުރީކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ހުށަހެޅި އެވެ. އެއީ 2023 ވަނަ އަހަރުގެ ރިޔާސީ އިންތިހާބުގައި އެ ޕާޓީ ބަލިވިފަހުން ޕާޓީގެ ގާނޫނު ހަދާ މަޖިލީހުގެ 14 މެންބަރުން ޕީއެންސީ އަށް ބަދަލުވުމުން ނެވެ.
