ވެރިކަން ކުރާ ޕްރޮގްރެސިވް ޕާޓީ އޮފް މޯލްޑިވްސް (ޕީއެންސީ) އިން އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް ތުހުމަތު ކުރަމުން، އެ ޕާޓީން ދޮގު މައުލޫމާތު ފަތުރާ ކަމަށް ބުނެ އެކަން ކުށްވެރިކޮށް ބަޔާނެއް ނެރެފި އެވެ.
އިއްޔެ ނެރުނު ބަޔާނުގައި ޕީއެންސީން ބުނެފައިވަނީ ފާއިތުވި އެއް އަހަރު ދުވަހު ރައީސް ޑރ. މުހައްމަދު މުއިއްޒުގެ ވެރިކަމުގައި ސަރުކާރު ހިންގާފައިވަނީ ޒިންމާދާރުކަމާއެކު ރައްޔިތުންގެ މާލިއްޔަތަށް އަމާނާތްތެރިވެ، ހާމަކަން ބޮޑު ގޮތެއްގައި ރައްޔިތުންނަށް ހުރިހާ މައުލޫމާތެއް ފޯރުކޮށްދީގެން ކަމަށެވެ.
މި ބަޔާނުގައި ފާހަގަކޮށްފައިވާ ގޮތުގައި ފާއިތުވި ތިން އަހަރު ދައުލަތުގެ ހަރަދުތައް އެވްރެޖްކޮށް 15 އިންސައްތަ އިތުރުވަމުން ދިޔަ ނަމަވެސް މި އަހަރު ދައުލަތުގެ ހަރަދުތައް އިތުރުވެފައިވަނީ އެންމެ 2.5 އިންސައްތައިން ނެވެ. މީގެ ނަތީޖާއެއްގެ ގޮތުން ބަޖެޓުގެ ޑެފިސިޓު 378 މިލިއަން ރުފިޔާއިން ކުޑަކުރެވި، 3.6 އިންސައްތައިން ދަށަށް ގޮސްފައިވާ ކަމަށް ވެސް ބަޔާނުގައި ބުނެފައިވެ އެވެ.
އިތުރަށް ޕީއެންސީން ފާހަގަކޮށްފައިވަނީ ކުރީގެ ސަރުކާރުން ބޭރުގެ ފަރާތްތަކުގެ އެހީގައި ހިންގި މަޝްރޫއުތަކުގެ ހަރަދުތައް ރިކޯޑް ނުކުރުމުގެ ސަބަބުން ކުރިމަތިވި މައްސަލަތައް ހައްލުކުރުމަށްފަހު، މިހާރު ކޮންމެ ހަފްތާއަކު ހަރަދާއި އާމްދަނީގެ ތަފްސީލްތައް އާންމުކުރަމުން އަންނަ ކަމަށެވެ. އެންމެ ފަހުން މި މައުލޫމާތު ހާމަކޮށްފައިވަނީ މި މަހުގެ 7 ވަނަ ދުވަހުއެވެ.
މީގެ އިތުރުން، ރައީސް އޮފީހަށް ހުށަހެޅުނު ހުރިހާ މައުލޫމާތު ހޯދުމާއި ލިބިގަތުމުގެ ހައްގުގެ (އާރުޓީއައި) ހުށަހެޅުންތަކަށް ޖަވާބުދީފައިވާ ކަމަށާއި، މިނިސްޓްރީތަކުގެ އާރުޓީއައިތަކަށް ވެސް ޖަވާބު ދެމުން އަންނަ ކަމަށް ބަޔާނުގައި ބުނެފައިވެ އެވެ. ނަމަވެސް، މިދިޔަ ސަރުކާރުގައި ދައުލަތުގެ ކުންފުނިތަކުން އެއްވެސް އާރްޓީއައިއަކަށް ޖަވާބުދީފައި ނުވާކަން ޕީއެންސީން ފާހަގަކޮށްފައިވެ އެވެ.
