މޯލްޑިވްސް ކަސްޓަމްސް ސާވިސްއިން އަތުލައިގަތް ވޭޕް ފްލޭވަރސްގެ ޝިޕްމަންޓެއްގައި ކެނަބިސް ހުރިކަމަށް ޝައްކުކުރެވިގެން ޓެސްޓް ކުރިއިރު އެތަކެތި މަސްތުވާތަކެއްޗަށް ނެގެޓިވްވެފައިވާކަމަށް ފުލުހުންގެ ހިދުމަތުން މިއަދު ބުނެފި އެވެ.
މޯލްޑިވްސް ކަސްޓަމްސް ސާވިސް އިން މި ޝިޕްމަންޓް އަތުލައިގަތީ އޮކްޓޯބަރު މަހުގެ 14 ވަނަ ދުވަހު އެވެ. މިނިސްޓަރު އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވެސް ވަނީ އެރޭ ސޯޝަލް މީޑިއާ ޕްލެޓްފޯމް އެކްސްގައި ވޭޕް ފްލޭވަރެއްގެ ގޮތުގައި ގެނައި ޝިޕްމަންޓްގައި މަސްތުވާތަކެތި ހުރި ކަމަށް ބެލެވޭ ކަމަށް ވިދާޅުވެ ޕޯސްޓެއް ކުރައްވާފަ އެވެ. އޭނާ ވަނީ ވޭޕް ކާޓްރިޖްތަކުގެ ފޮޓޯތައް ހިއްސާކުރައްވާ، އެ ކާޓްރިޖްތައް ކަސްޓަމްސް އިން އަތުލައިގަތްކަން އިއުލާންކުރައްވާފަ އެވެ.
މިއަދު މީޑިއާއާ ހިއްސާކުރި މެސެޖެއްގައި ފުލުހުން ބުނީ، ޝިޕްމަންޓްގައި ހުރި އުފެއްދުންތައް މަސްތުވާތަކެތި ހުރިތޯ ޓެސްޓުކޮށްފައިވަނީ ޕޮލިސް ލެބޯޓްރީގައި ކަމަށެވެ. ނަތީޖާތަކުން ދައްކާ ގޮތުގައި އެތަކެތީގައި އެއްވެސް ބާވަތެއްގެ މަސްތުވާތަކެތި ނުހިމެނެ އެވެ.
އޭރު އިހުސާން ވިދާޅުވީ މަސްތުވާތަކެތި ހިމެނޭ ވޭޕް ފްލޭވަރސް ސްކޫލް ކުދިންނަށް ވިއްކަމުންދާ ކަމަށާއި، މިއީ ރައީސް ޑރ. މުހައްމަދު މުއިއްޒު ވޭޕް މަނާކުރަން ނިންމެވި މައިގަނޑު އެއް ސަބަބެއްގެ ގޮތުގައި ފާހަގަކުރައްވާ ކަމަށެވެ.
ނޮވެމްބަރު މަހުގެ 15 ވަނަ ދުވަހުން ފެށިގެން ރާއްޖޭގައި ވޭޕް އަދި އެއާ ގުޅުންހުރި އުފެއްދުންތައް އެތެރެކުރުން މަނާކޮށްފައިވެ އެވެ. ޑިސެމްބަރު 15 އިން ފެށިގެން އެފަދަ އުފެއްދުންތައް ބޭނުންކުރުމާއި ބެހުން އަދި ވިއްކުން ވެސް މަނާކުރާނެ އެވެ.
