މި ސަރުކާރުގެ ފުރަތަމަ އަހަރުގެ ތެރޭގައި ދެ ބިލިއަން ރުފިޔާގެ 38 މަޝްރޫއު ނިންމާފައިވާ ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން މިއަދު ހާމަކޮށްފިއެވެ.
މިނިސްޓްރީން ބުނެފައިވާ ގޮތުގައި، މަޝްރޫއުތައް ހިންގުމުގައި އެންމެ ބޮޑު ގޮންޖެހުމަކަށް ވެފައިވަނީ ކުރީގެ ސަރުކާރުން އެކި ސަބަބުތަކާ ހުރެ ރަށްރަށުގައި ހުއްޓާލާފައި ހުރި ޕްރޮޖެކްޓްތައް އަލުން ފަށަން ޖެހުމެވެ. އަދި އޭރު ފާސްކޮށްފައި އޮތް ބަޖެޓުގެ ސަބަބުން މަޝްރޫއުތައް ހިންގުމަށް ތާށިކަން ކުރިމަތިވި ކަމަށްވެސް މިނިސްޓްރީން ފާހަގަކޮށްފައިވެ އެވެ.
ނަމަވެސް، ބަޖެޓުގެ އުނދަގޫތަކާ އެކުވެސް، ހުއްޓިފައިވާ މަޝްރޫއުތައް އަލުން ފެށުމަށް ޚާއްޞަ ސަމާލުކަމެއް ދީފައިވާ ކަމަށް މިނިސްޓްރީން ބުނެފައިވެ އެވެ. މި މަސައްކަތްތައް ރަށްރަށުގެ ބަނދަރުމަތިންނާއި ތޮށިގަނޑުންނާއި ހިއްކި ސަރަހައްދުތަކުން ފެންނަން ހުންނާނެ ކަމަށްވެސް މިނިސްޓްރީން ފާހަގަކޮށްފައިވެ އެވެ.
މިނިސްޓްރީން ހާމަކޮށްފައިވާ ގޮތުގައި، 17 ނޮވެންބަރު 2024 އާ ހަމައަށް، ޖުމްލަ 38 މަޝްރޫއު ނިންމާލެވިފައިވެ އެވެ. މި މަޝްރޫއުތަކުގެ ޖުމްލަ އަގު 1.976 ބިލިއަން ރުފިޔާއާ ގާތްކުރާ ކަމަށް މިނިސްޓްރީން ބުނެފައިވެ އެވެ.
ނިމިފައިވާ މަޝްރޫއުތަކުގެ ތެރޭގައި ގދ. ތިނަދޫ މަގު ހެދުމުގެ މަޝްރޫއު އަދި ނ. މާފަރު ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއު ހިމެނެ އެވެ. މީގެ އިތުރުން، ގޮނޑުދޮށް ހިމާޔަތްކުރުން ނުހިމަނައި، 11 ރަށެއްގެ ބިން ހިއްކުމުގެ މަޝްރޫއު ނިންމާލާފައިވާއިރު، މ. މުލި، އއ. މާޅޮސް، އއ. ތޮއްޑޫ އަދި އދ. ފެންފުށީގެ ބަނދަރު ހެދުމުގެ މަޝްރޫއުތައްވެސް ނިމިފައިވާ ކަމަށް މިނިސްޓްރީން ހާމަކޮށްފައިވެ އެވެ.
ފެނާއި ނަރުދަމާގެ 29 މަޝްރޫއު މިދިޔަ އަހަރެއްހާ ދުވަހުގެ ތެރޭގައި ނިމިފައިވާއިރު، އަންނަ ޑިސެންބަރު މަހުގެ ނިޔަލަށް އިތުރު 26 މަޝްރޫއު ނިމޭނެ ކަމަށް މިނިސްޓްރީން ލަފާކުރާ ކަމަށްވެސް ބުނެފައިވެ އެވެ.
ބޯހިޔާވަހިކަމުގެ ބޮޑު މަޝްރޫއެއް ކުރިއަށް ގެންދާ ގުޅީފަޅު ހިއްކުމުގެ މަސައްކަތްވެސް މުޅިން ނިމިފައިވާ ކަމަށް މިނިސްޓްރީން ހާމަކޮށްފައިވެ އެވެ.
މީގެ އިތުރުން، ކުރީގެ ސަރުކާރުން ފެށި ތިލަފުށި-މާލެ ބްރިޖުގެ މަސައްކަތްވެސް ބާރު ދުވެއްޔެއްގައި ކުރިއަށްދާ ކަމަށް މިނިސްޓްރީން ފާހަގަކޮށްފައިވެ އެވެ. މިދިޔަ އަހަރުގެ އޮކްޓޫބަރާ ހަމައަށް މި މަޝްރޫއުގެ 28.7 އިންސައްތަ ނިމިފައިވާއިރު، މިހާރު އަހަރެއްގެ ތެރޭގައި ބްރިޖުގެ މަސައްކަތުގެ 46.6 އިންސައްތަ ނިމިފައިވާ ކަމަށް މިނިސްޓްރީން މަޢުލޫމާތު ދީފައިވެ އެވެ.
މި ހުރިހާ މަޝްރޫއުތަކަކީވެސް ރާއްޖޭގެ އިޤްތިޞާދީ އަދި އިޖްތިމާޢީ ތަރައްޤީއަށް މުހިންމު މަޝްރޫއުތަކެއް ކަމަށް މިނިސްޓްރީން ފާހަގަކޮށްފައިވެ އެވެ. މި މަޝްރޫއުތަކުގެ ސަބަބުން ރާއްޖޭގެ އެކި ކަންކޮޅުތަކުގައި ދިރިއުޅޭ ރައްޔިތުންނަށް ލުއިފަސޭހަކަން ލިބި، އަދި ޚިދުމަތްތައް ފުޅާވެގެންދާނެ ކަމަށްވެސް މިނިސްޓްރީން ބުނެފައިވެ އެވެ.
މިނިސްޓްރީން އިތުރަށް ބުނެފައިވަނީ، ކުރިއަށް އޮތް ތަނުގައިވެސް ރާއްޖޭގެ ތަރައްޤީއަށް މުހިންމު އެތައް މަޝްރޫއެއް ހިންގުމަށް ރޭވިފައިވާ ކަމަށެވެ. އަދި މި މަޝްރޫއުތައް ވީހާވެސް އަވަހަކަށް ނިންމައި، ރައްޔިތުންނަށް އޭގެ ފައިދާ ލިބޭނެ ގޮތް ހަދައިދިނުމަށް މަސައްކަތްކުރާނެ ކަމަށްވެސް މިނިސްޓްރީން ވަނީ ޔަގީންކަން ދީފަ އެވެ.
