މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ބިލު އަނބުރާ ގެންދިއުމަށް އެ ބިލު ހުށަހެޅުއްވި މެންބަރު ނިންމަވައިފި އެވެ.
މި ބިލު ރައްޔިތުންގެ މަޖިލީހަށް ހުށަހެޅުއްވީ ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރެވެ. މެންބަރު ހަންނާން ވަނީ މި ބިލު އަނބުރާ ގެންދަވަން ނިންމަވާފައިވާކަން ކަށަވަރުކޮށްދެއްވާފަ އެވެ.
މި ބިލު އަނބުރާ ގެންދަން ނިންމާފައިވާކަން މެންބަރު ހާމަ ކުރެއްވި އިރު މި ބިލު މަޖިލީހުން ބޭރުކޮށްލައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ވިދާޅުވެފަ އެވެ.
ރައްޔިތުންގެ މަޖިލީހަށް މި ބިލު ހުށަހެޅުމާއެކު ނޫސްވެރިންގެ ހައްގުގައި މަސައްކަތް ކުރާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އިސްނަގައިގެން ވަނީ މި ބިލާ ދެކޮޅަށް ’ހަތަރެއްގެ ހައްގުގައި‘ ނަމުގައ ހަރަކާތެއްވެސް ފަށާފަ އެވެ. އަދި މި ބިލާ ދެކޮޅަށް އެ އެސޯސިއޭޝަނުން ވަނީ ނޫސްވެރިންގެ ބައްދަލުވުމެއްވެސް ބާއްވާފަ އެވެ.
މެންބަރު ހަންނާން ހުށަހެޅުއްވި ބިލުގައި ވަނީ މީޑިއާ ކައުންސިލާއި ބްރޯޑްކޮމް އެއްކޮށްލާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަންގެ ނަމުގައި އާ ކޮމިޝަނެއް އުފެއްދުމަށް ހިމަނާފަ އެވެ. އަދި އަލަށް އުފައްދާ ކޮމިޝަނުގައި ތިބޭނީ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަން ކުރައްވާ 4 މެންބަރަކާއި މީޑިއާތަކުން އައްޔަން ކުރާ 3 މެންބަރުންކަމަށް ހިމަނާފައިވެ އެވެ.
މީގެ އިތުރުން، މި ބިލުގައި މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ޚިލާފު ވެއްޖެ ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބަޔާންކޮށްފައިވެއެވެ. އަދި ވަކިވަކި ނޫސްވެރިން 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ބިލުގައި ބަޔާންކޮށްފައިވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލިސް މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) މޯލްޑިވްސް މީޑިއާ ކައުންސިލް (އެމްއެމްސީ) ތުޅާދޫ ދާއިރާގެ މެންބަރު އަބްދުލްހަންނާން އަބޫބަކުރު
