ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ މެނޭޖިންގ ޑިރެކްޓަރ ހުސައިން ފަހުމީއަށް އޭޝިޔާގެ އެންމެ އިންސްޕަޔަރިން އެގްޒެކިއުޓިވްގެ މަގާމް ލިބިވަޑައިގެންފި އެވެ.
މި މަގާމަކީ މެލޭޝިޔާގެ މީޑިއާ ކޮންސަލްޓެންސީއަކުން އޭޝިޔާ ސަރަހައްދުގެ ކުންފުނިތަކަށް ދޭ ޚާއްޞަ ޝަރަފްވެރި އެވޯޑެއް ކަމުގައިވާ ”އޭޝިއާސް ޕްރިމިއާ ލީޑާޝިޕް އެންޑް ސަސްޓެއިނަބިލިޓީ އެވޯޑް“ އެވެ.
މިއީ ރާއްޖޭގެ ކުންފުންޏެއްގެ އެމްޑީއަކަށް މި އެވޯޑް ލިބުނު ފުރަތަމަ ފަހަރެވެ. އެވޯޑްގެ ވެބްސައިޓްގައި ޝާއިޢުކޮށްފައިވާ ޚަބަރުގައި ވަނީ ފަހުމީ ސްޓެލްކޯއަށް ކޮށްދެއްވާފައިވާ ޚިދުމަތްތަކުގެ އުސްއަލިތައް ފާހަގަކޮށްފަ އެވެ.
ހުސައިން ފަހުމީ ސްޓެލްކޯއާ ގުޅިވަޑައިގަތީ 1998 ވަނަ އަހަރު އެކައުންޓް އެސިސްޓެންޓް ޓްރެއިނީއެއްގެ ގޮތުގަ އެވެ. އޭގެ ފަހުން އެކި މަގާމުތައް ފުރުއްވުމަށްފަހު، އެންމެ ފަހުން އަދާކުރެއްވީ ޖެނެރަލް މެނޭޖަރުކަމުގެ މަގާމެވެ. ފަހުމީ ވަނީ ސްޓެލްކޯގައި 26 އަހަރަށްވުރެ ގިނަ ދުވަހު މަސައްކަތް ކުރައްވާފަ އެވެ.
ފަހުމީގެ ލީޑަރޝިޕްގެ ދަށުން، ސްޓެލްކޯއިން ވަނީ މުޅި ރާއްޖޭގައި ސޯލާ ފޮޓޯވޮލްޓިކް ސިސްޓަމްތަކާއި ބެޓެރީ އެނާޖީ ސްޓޯރޭޖް ސިސްޓަމްސް (ބީއީއެސްއެސް) ތަޢާރަފްކޮށްފަ އެވެ. މީގެ އިތުރުން، ތިމާވެށްޓާ ރައްޓެހި ދަތުރުފަތުރުގެ ވަސީލަތްތައް ކަމުގައިވާ އިލެކްޓްރިކް މޮޓޯސައިކަލްތަކާއި އިލެކްޓްރިކް ވެހިކަލް ޗާޖިންގ އިންފްރާސްޓްރަކްޗަރ ވެސް ތަޢާރަފްކުރެއްވި އެވެ.
ފަހުމީގެ އިސްނެންގެވުމުގެ ދަށުން، ސްމާޓް މީޓަރުގެ ޒަރީއާއިން ރިއަލް ޓައިމްގައި ކަރަންޓް މީޓަރު ބެލޭނެ ނިޒާމް ތަޢާރަފްކުރުމާއި، ސްޓެލްކޯ ހައުސިންގ ޕްރޮޖެކްޓްގެ ދަށުން 360 އެޕާޓްމަންޓް ކުންފުނީގެ މުވައްޒަފުންނަށް ގާއިމްކޮށްދިނުން ފަދަ މުހިންމު މަސައްކަތްތަކެއް ކުރެވިފައިވެ އެވެ.
މީގެ އިތުރުން، ފަހުމީ ވަނީ އޮޕަރޭޝަނަލް އެފިޝަންސީ އިތުރުކޮށް، ރިއަލް ޓައިމް މޮނިޓަރިންގ އާއި ހަކަތަ މެނޭޖްމަންޓް ރަނގަޅު ކުރުމަށް ސްމާޓް ގްރިޑް ޓެކްނޮލޮޖީތައް އިންޓަގްރޭޓް ކުރުމުގެ ޕްލޭންތައް ރާވާ ފައެވެ. އަދި ސްޓެލްކޯ ރިސާޗް ފައުންޑޭޝަން އުފެއްދުމުގައި ވެސް އިސްކޮށް ހަރަކާތްތެރިވެ، ހަކަތައާ ބެހޭ އާ ހައްލުތަކާ ބެހޭ ދިރާސާތަކަށް މަގުފަހިކޮށްދީފައިވެ އެވެ.
ފަހުމީ ވަނީ ޔުނިވާސިޓީ އޮފް އަބްޑީން އިން އެކައުންޓްސް ދާއިރާއިން މާސްޓާސް ޑިގްރީއެއް އަދި ޔުނިވާސިޓީ އޮފް އީސްޓް ލަންޑަން އިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓާސް ޑިގްރީއެއް ހާސިލުކުރައްވާފަ އެވެ.
އޭޝިއާސް ޕްރިމިއާ ލީޑާޝިޕް އެންޑް ސަސްޓެއިނަބިލިޓީ އެވޯޑްގެ ވެބްސައިޓްގައި ވަނީ ފަހުމީގެ އެމްޑީކަމުގެ ދަށުން ސްޓެލްކޯއަށް ފުދޭވަރެއްގެ ކުރިއެރުމެއް ލިބިފައިވާ ކަމަށް ބުނެފަ އެވެ. ޚާއްޞަކޮށް، ފޮސިލް ފިއުލްއަށް ބަރޯސާވުން މަދުކޮށް، ދެމެހެއްޓެނިވި ގޮތެއްގައި ހަކަތައިގެ ކަންކަން ކުރިއެރުވުމާއި، އިތުރު އާމްދަނީ ހޯދުމަށް ކުރެވުނު މަސައްކަތްތައް ފާހަގަކޮށްފައިވެ އެވެ.
