އައްޑޫ ސިޓީއަށް ބޯކޮށް ވާރޭ ވެހި ފެން ބޮޑުވި ސަރަހައްދުތަކުން ފެން ހިންދުމުގައި އެމްއެންޑީއެފް ސަދަން އޭރިއާ ކޮމާންޑުގެ ސިފައިން ހަރަކާތްތެރިވެއްޖެ އެވެ.
އެމްއެންޑީއެފް އިން ބުނީ ބޯކޮށް ވާރޭ ވެހި އައްޑޫ ސިޓީ ފޭދޫ މަގުތަކުގައި ފެންބޮޑުވުމުން، ރޭ 23:25 ހާއިރުން ފެށިގެން އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ ޕަންޕު ބަހައްޓައިގެން ފެން ހިންދުމުގެ މަސައްކަތް ކޮށްފައިވާ ކަމަށެވެ. ފޭދޫ މަގުތަކުގައި ބޮޑުވި ފެންގަނޑު ހިންދާލެވުނީ މިއަދު ހެނދުނު 09:25 ހާއިރު ކަމަށް އެމްްއެންޑީއެފް އިން ބުންޏެވެ.
މީގެ އިތުރުން، ބޯކޮށް ވާރޭ ވެހި، އައްޑޫ ސިޓީ ހުޅުމީދޫގައި ހުންނަ ސީނު އަތޮޅު މަދަރުސާ ގޯތިތެރޭގައި ފެންބޮޑުވުމުން، މިއަދު ހެނދުނު 07:25 އިން ފެށިގެން އެމްއެންޑީއެފް ސަދަން އޭރިއާ ކޮމާންޑް، ހުޅުމީދޫ ފަޔަރ ސްޓޭޝަނުގެ ފަޔަރ ފައިޓަރުން ވަނީ ފެން ހިންދުމުގެ މަސައްކަތް ކޮށްފައިވެ އެވެ. ސ. އަތޮޅު މަދަރުސާ ގޯތިތެރޭގައި ބޮޑުވި ފެންގަނޑު ހިންދާލެވުނީ މިއަދު 09:20 ހާއިރުގައި ކަމަށް އެމްއެންޑީއެފް އިން މައުލޫމާތު ދިނެވެ.
އިއްޔެ ރާއްޖޭގެ ބޮޑު ބަޔަކަށް ކުރި ވިއްސާރައިގައި އެންމެ ބޯކޮށް ވާރޭވެހިފައިވަނީ އައްޑޫ ހިތަދޫއަށެވެ. އިއްޔެ ހެނދުނު 08:00 އިން މިއަދު ހެނދުނު 08:00 އަށް ހިތަދޫއަށް 110 މިލިމީޓަރުގެ ވާރޭ ވެހިފައި ވެއެވެެ.
ކުރިއަށް އޮތް ތިން ދުވަހު މުޅި ރާއްޖޭގެ އެކި ކަންކޮޅުތަކަށް ވިއްސާރަ ކުރާނެ ކަމަށް މެޓް އޮފީހުން ލަފާކޮށްފައި ވެއެވެ. އެހެންކަމުން، މޫސުމަށް ސަމާލުވުމަށް އެ އިދާރާއިން އިލްތިމާސްކޮށްފައި ވެއެވެ.
