ސިއްހީ ނިޒާމަށް ހެޔޮ ބަދަލުތަކެއް ނުގެނެސްފިނަމަ ރާއްޖެތެރޭގެ ރައްޔިތުން އެ ރަށްރަށުން ބާލަންޖެހޭ ހާލަތަށް ދާނެ ކަމަށް މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.

އައްބާސް މިހެން ވިދާޅުވެފައި ވަނީ، މިއަދު މަޖިލީހުގައި، އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅާފައިވާ ދައުލަތުގެ ބަޖެޓަށް ބަހުސްކުރަމުން ނެވެ.

އައްބާސް ވިދާޅުވީ، ނިމިގެންދިޔަ 30 އަހަރުވެސް ރާއްޖޭގެ ސިއްހީ ނިޒާމަށް ހެޔޮ ބަދަލުތަކެއް ގެންނަން މަސައްކަތް ކޮށްފައިނުވާ ކަމަށެވެ. އެހެންނަމަވެސް މި ސަރުކާރުގެ ރައީސުލްޖުމްހޫރިއްޔާ އުންމީދީ ބަސްތަކެއް މިދާ ދުވަސްތަކުގެ ތެރޭގައި ދޭ ކަމަށް އޭނާ ފާހަގަކުރެއްވި އެވެ.

”އަޅުގަނޑަކީ ޕީއެންސީގެ މެންބަރެއް ކަމުގައި ނުވިކަމުގައި ވިޔަސް އަޅުގަނޑު ނިސްބަތްވާ ދާއިރާގެ މެންބަރުން އިންތިހާބު ކުރީ، ޕާލިމެންޓް މެންބަރެއް އަޅުގަނޑަކީ، އަޅުގަނޑު ޖަބޫލު ކުރަނީ އެއީ އިންސާނުން ކަމުގައިވީތީ އެބޭފުޅުންނަށް ސަރުކާރުން ފޯރުކޮށްދެން ޖެހޭ އަސާސީ، ޒަރޫރީ އެންމެހާ ހިދުމަތްތަށް ފޯރުކޮސްދިނުމުގައި އަޅުގަނޑެކޭ ޕީއެންސީ މެންބަރެކޭ ތަފާތު ނުކުރާނެ ކަމަށް.“

ވެލިދޫގައި ހޮސްޕިޓަލެއް އަޅުއްވާނެ ކަމަށް 2018 ވަނަ އަހަރު ރައީސް އިބްރަހީމް މުހައްމަދު ސޯލިހު ވެވަޑައިގެނނެވި ވައުދު 5 އަހަރުގެ ދައުރެއް ނިމިގެން ދިޔައިރު ދިޔައީ ބިންގާވެސް ނޭޅި ކަމަށްވެސް އައްބާސް ފާހަގަކުރެއްވި އެވެ. އޭނާ ވިދާޅުވީ 2023 ވަނަ އަހަރުގެ ރިޔާސީ އިންތިހާބަށް ސަރުކާރުން ވެލިދޫގައި ހޮސްޕިޓަލުގެ 3 ފާރު ވަކިކުރުމަށް އިންޑިއާ ބަޔަކު ގެނެސް ކަޅުދާ ޖެހި ކަމަށެވެ.

އައްބާސް އިތުރަށް ވިދާޅުވީ، ރައީސް ޑރ. މުހައްމަދު މުއިއްޒު ވެލިދޫގައި ހޮސްޕިޓަލެއް އަޅަން ވައުދުވެ ވަޑައިގެން ކަމަށާއި، ކުވައިތު ފަންޑުން ހޮސްޕިޓަލް އަޅަން ފައިސާ ލިބިފައިވާ ކަމަށެވެ.

ރައްޔިތުންގެ މަޖިލިސް ބަޖެ ބަޖެޓް ކޮމިޓީ ވެލިދޫ ދާއިރާގެ މެންބަރު މުހައްމަދު އައްބާސް