ކުރިއަށް އޮތް އަހަރު 12،000 އަށް ވުރެ ގިނަ ހައުސިން ޔުނިޓް އަތޮޅު ތެރޭގައި ތަރައްގީ ކުރުމުގެ މަސައްކަތް ރާވާފައިވާކަން ރައީސް ޑރ. މުހައްމަދު މުއިއްޒު އިއުލާން ކުރައްވައިފި އެވެ.
ރައީސް މިކަން އިއުލާންކުރެއްވީ އެމަނިކުފާނުގެ ވެރިކަމުގެ ފުރަތަމަ އަހަރީ ދުވަސް ފާހަގަކުރުމުގެ ގޮތުން ރޭ ބޭއްވި ރަސްމިއްޔާތެއްގައި ދެއްކެވި ވާހަކަފުޅުގަ އެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި 2025 ވަނަ އަހަރުގެ ދައުލަތުގެ ބަޖެޓުގައި ބޯހިޔާވަހިކަމަށް އެންމެ އިސްކަމެއް ދީފައިވަނީ، އެއީ ގައުމުގެ އެންމެ ބޮޑު އިޖުތިމާއީ ގޮންޖެހުމެއްގެ ގޮތުގައި ދެނެގަނެގެން ނެވެ. ރައީސް ވަނީ އާބާދީ ބޮޑު އަދި އާބާދީ މަދު ރަށްރަށުގައި 41 އާ ހައުސިން މަޝްރޫއު ފެށުމާ އެކު 12،490 ހައުސިން ޔުނިޓް ތަރައްގީ ކުރުމުގެ ޕްލޭންތައް ހާމަކުރައްވާފަ އެވެ.
”އަތޮޅުތެރޭގައި 12940 ހައުސިންގ ޔުނިޓް. އެއީ، ވަޢުދުތައް. ހުސް ވަޢުދު އިނގޭތޯ. އަޅުގަނޑު ރަށްރަށަށް ގޮސް، ވެފައި ހުރި ވަޢުދުތައް. މިސާލަކަށް، ކުޅުދުއްފުށީ ސިޓީގައި އަޅާ ފްލެޓްތައް އޭގެތެރޭގައި ހިމެނޭނެ. އަޅުގަނޑު ވަޢުދުވިން، ތިނަދޫ، އައްޑޫ، ފުވައްމުލައް އަދި ބައެއް ރަށްތަކުގައި ޢަދަދުތަކާއެކީ ވަޢުދުވެފައި ހުންނާނެ. 30 ން، 50 ން، 100 އިން. ލިޔެވިފައި ހުރި އެއްޗެހި މިއީ. ޖުމްލަ 12940 ހައުސިންގ ޔުނިޓުގެ ޢަމަލީ މަސައްކަތް، މި ދެންނެވި 1.5 ބިލިއަން ރުފިޔާގެ ޕީ.އެސް.އައި.ޕީ. މަޝްރޫޢުތަކުގެ ތެރެއިން މި އަންނަ އަހަރު ހިންގަން ފަށާނަމޭ. އިރާދަކުރެއްވިއްޔާ، އެ މަސައްކަތްތައް މި ދައުރުގައި ނިންމައި ހަވާލުކުރާނަމޭ.“
ރައީސް މުއިއްޒު ވަނީ އެމަނިކުފާނުގެ ދައުރު ނިމުމުގެ ކުރިން މި މަޝްރޫއުތައް ނިންމަވައި، ޔުނިޓްތައް ލިބޭ ފަރާތްތަކާ ހަވާލުކުރުމަށް އަޒުމް ކަނޑައަޅާފައިވާ ކަމުގެ ޔަގީންކަން ރައްޔިތުންނަށް ދެއްވާފަ އެވެ. އަދި ކުރިއަށް އޮތް 20 އަހަރު ދުވަހުގެ ތެރޭގައި 65،000 ހައުސިން ޔުނިޓް ރައްކާތެރި ކުރުމުގެ އަމާޒު ހިފައިގެން ދިވެހި ކޮންމެ އާއިލާއަކަށް ހައުސިން ޔުނިޓެއް ލިބޭނެ ގޮތް ހެދުމުގެ ފުޅާ ތަސައްވުރު ފާހަގަކުރެއްވި އެވެ.
ހުށަހަޅާފައިވާ ދައުލަތުގެ ބަޖެޓް 2025 ގައި ބޯހިޔާވަހިކަމުގެ މަޝްރޫއުތަކަށް 194 މިލިއަން ޑޮލަރަށް ވުރެ ގިނަ ޑޮލަރު ކަނޑައަޅާފައިވެ އެވެ. %5 އިންޓަރެސްޓް ރޭޓުން ބޯހިޔާވަހިކަމުގެ ލޯނު ދޫކުރުމަށް 64.9 މިލިއަން ޑޮލަރު އަދި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ބޯހިޔާވަހިކަމުގެ މަޝްރޫއުތަކަށް 116.7 މިލިއަން ޑޮލަރު ކަނޑައަޅާފައި ވެއެވެ.
އަދި މާލެ ސަރަޙައްދުގައި 15000 ހައުސިންގ ޔުނިޓް، މި އަންނަ އަހަރު އަޅަން ފަށާނެ ކަމަށްވެސް ރައީސް ވިދާޅުވި އެވެ. އަންނަ އަހަރު 41 ރަށެއްގައި އަލަށް ހައުސިން ޔުނިޓް އެޅުމުގެ މަޝްރޫއު ފެށޭނެ ކަމަށް ރައީސް ހާމަކުރެއްވި އެވެ.
ރައީސް ޑރ. މުޢިއްޒު ވަނީ އެމަނިކުފާނުގެ ވެރިކަމުގައި ބޯހިޔާވަހިކަމުގެ މަސައްކަތްތައް މުޅި ގައުމަށް ފުޅާވެ، އާބަން ސެންޓަރުތަކާއި ދުރު ރަށްރަށުގައި ހަމަހަމަ ތަރައްގީއެއް ކަށަވަރުކޮށްދެއްވާނެކަމަށް ވިދާޅުވެ ފައެވެ. މި މަސައްކަތްތަކުގެ ސަބަބުން އިޖުތިމާއީ އަދި އިގްތިސާދީ ދުޅަހެޔޮކަން ވަރަށް ބޮޑަށް އިތުރުވެގެންދާނެ ކަމުގެ ޔަގީންކަން ފާޅުކުރެއްވި އެވެ.
ހައުސިން ޔުނިޓް ރައީސުލްޖުމްހޫރިއްޔާ ޑރ. މުހައްމަދު މުއިއްޒު
