ކުރީގެ ސަރުކާރުތަކުން ހިންގަމުން އައި ކުންފުނިތައް ބަނގުރޫޓްވުމުން ދޫކޮށްލިހެން އާސަންދަ ކުންފުނިވެސް ދޫކޮށްލައި އައު ގޮތްތަކެއް ހޯދަންޖެހިފައިވާ ކަމަށް ރައްޔިތުންގެ މަޖިލީހުގެ ނައިބު ރައީސް އަހުމަދު ނާޒިމް ވިދާޅުވެއްޖެ އެވެ.
ނާޒިމް މިފަދައިން ވިދާޅުވެފައިވަނީ މިއަދު މަޖިލީހުގައި، އަންނަ އަހަރަށް ލަފާކޮށް ފިނޭންސް މިނިސްޓްރީން ހުށަހަޅާފައިވާ ދައުލަތުގެ ބަޖެޓަށް ބަހުސްކުރަމުން ނެވެ. މި ބަހުސްގައި ވާހަކަ ދައްކަވަމުން ނާޒިމް ފާހަގަކުރެއްވި ގޮތުގައި، ސިއްހީ ދާއިރާއަށް ދިމާވެފައިވާ އެންމެ ބޮޑު ގޮންޖެހުމަކީ އެންސްޕާ އާއި އާސަންދައިން ކުރަންޖެހިފައިވާ ބޭކާރު ޚަރަދުތައް ގިނަވުމެވެ.
”އަޅުގަނޑުމެންނަށް ފެންނަ ފެނުމުގައި އާސަންދަ މިވަނީ ރަނގަޅު ނުކުރެވޭ މިންވަރަށް، ރީފޯމް ނުކުރެވޭ މިންވަރަށް ގޯސްވެފަ. އަސްލު ކެންސަރު ޖެހިފައި ވަނީ އާސަންދައަށް. އެހެންވީމަ އަޅުގަނޑުމެން އެބަޖެހޭ ވިސްނުމެއް ގެންގުޅެން,“ ނާޒިމް ވިދާޅުވި އެވެ.
އިތުރަށް ވާހަކަ ދައްކަވަމުން ނާޒިމް ވިދާޅުވީ، އެއަރ މޯލްޑިވްސް އާއި އެހެނިހެން ކުންފުނިތައް ދޫކޮށްލި ފަދައިން އާސަންދަ ދޫކޮށްލާފައި އަލުން ފެށުމާ މެދު ފުންކޮށް ވިސްނަން ޖެހިފައިވާ ކަމަށެވެ. އަދި އާސަންދައިން ރާއްޖެއިން ބޭރުގެ ހޮސްޕިޓަލްތަކާއެކު ހަދާފައިވާ އެއްބަސްވުންތަކުގައި މެދުވެރިއެއް ހިމެނޭކަން ޔަގީންކުރެވޭ ކަމަށާއި، މީގެ ސަބަބަކީ ޗާޖުކޮށްފައި ހުންނަ އަގުތަކަކީ ގަބޫލުކުރަން ދަތި، ވަރަށް ބޮޑެތި އަގުތަކެއް ކަމުގައި ވެސް ނާޒިމް ފާހަގަކުރެއްވި އެވެ.
”ބައި އެޅޭ ގޮތަށް ހަދާފައި ހުންނަ އެގްރިމެންޓެއްގެ ދަށުން މި ސަރުކާރަކުން، އަޅުގަނޑުމެން ދެމިތިބޭކަށް ނުޖެހޭ. އާ ކުންފުންޏެއް ހަދާފައި ނަމަވެސް އާސަންދަ ހަމަ މަގަށް އަޅުވަން ޖެހޭ,“ ނާޒިމް ވިދާޅުވި އެވެ.
އޭގެއިތުރުން ނާޒިމް ވަނީ ސަރުކާރު ކުންފުނިތަކުގެ ކޮރަޕްޝަން އަދިވެސް ނުހުއްޓޭ ކަމަށާއި، ކުރިންވެސް އެ ކުންފުނިތަކުގެ ކޮރަޕްޝަނާ ގުޅޭގޮތުން އިވުނު ވާހަކަތައް މިހާރުވެސް އިވެމުންދާ ކަމަށް ވިދާޅުވެފަ އެވެ. ނާޒިމް ވިދާޅުވީ ސަރުކާރުގެ ކުންފުނިތަކަށް ބޮޑު ހޭދައެއް ކުރާ ކަމަށާއި ނަމަވެސް އެ ކުންފުނިތަކުގެ ކަންކަން އިސްލާހުވާތަން ނުފެންނަ ކަމަށެވެ.
ކުންފުނިތަކުން ހިންގާ ކޮރަޕްޝަންގެ ކަންކަން ހުއްޓޭތަން އަދިވެސް ނުފެންނަކަން ފާހަގަކޮށް ނާޒިމް ވިދާޅުވީ އެކަމާ ގުޅޭގޮތުން އިވޭ ވާހަކަތައް އަދިވެސް ނުހުއްޓި އިވެމުންދާ ކަމަށެވެ. އަދި މިމައްސަލަތައް ހައްލުކުރުމަށް ފިނޭންސް މިނިސްޓަރު ފިޔަވަޅުތައް އަޅުއްވަންޖެހޭކަމަށްވެސް ވިދާޅުވި އެވެ.
ރައްޔިތުންގެ މަޖިލިސް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް ދައުލަތުގެ ބަޖެޓް
