އިސްކަންދޭ ތަރުތީބުން އަންނަ އަހަރު ރައްޖޭގެ ހުރިހާ ރަށެއްގައި ތަރައްގީގެ މަޝްރޫއުތައް ހިނގާނެ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދު ޖަލްސާގައި މެންބަރުން ބަޖެޓް ބަހުސް ކުރިއަށް ގެންދެވިއިރު މިނިސްޓަރު ޒަމީރު މަޖިލީހުގެ ތަޅުމުގައި އިންނެވި އެވެ. އަދި މެންބަރުން ފާހަގަ ކުރެއްވި ކަންކަމާއި ގުޅޭގޮތުން އެމަނިކުފާނު ވެސް ވާހަކަ ދައްކަވާފައިވެ އެވެ.
އެގޮތުން މިނިސްޓަރު ޒަމީރު ވިދާޅުވީ ތަރައްގީގެ މަޝްރޫއުތަކަށް ބަޖެޓްގައި ކުޑަ އަދަދެއް ޖެހުމުން އެ މަޝްރޫއުތައް ނުހިނގާތަން މީގެކުރިން ފެންނަ ކަމަށެވެ. އަދި ތަރައްގީގެ މަޝްރޫއުތަކަށް ބޭނުންވާ ފަންޑު ކަނޑައަޅައި، ރައީސަށް ހުށަހަޅުއްވާފައިވާ ކަމަށް ވިދާޅުވި އެވެ.
މިނިސްޓަރު ޒަމީރު ވިދާޅުވީ ޕްރޮޖެކްޓްތައް ކުރިއަށް ގެންދާނީ ރައީސް ކަނޑައަޅުއްވާ އިސްކަންދޭ ތަރުތީބަށް ބަލައިގެން ކަމަށެވެ. އަދި ތަރައްގީގެ ލިސްޓުގައި އެއްވެސް ރަށެއް އުނިވެފައި ނޯންނާނެ ކަމަށްވެސް ވިދާޅުވި އެވެ. އަދި ބަޖެޓުން ޖާގަ ލިބެމުންދާ މިންވަރަކުން ޕްރޮޖެކްޓްތައް އިއުލާނު ކުރައްވާނެ ކަމަށްވެސް ވިދާޅުވި އެވެ.
މީގެއިތުރުން އާސަންދައާއި ގުޅޭގޮތުން ވާހަކަ ދައްކަވަމުން މިނިސްޓަރު ޒަމީރު ވިދާޅުވީ، އާސަންދައަށް ބަދަލު ގެނައީ އިސްރާފުވާ ފައިސާ މަދުކުރަން ކަމަށެވެ. އަދި އެކަމުން ރައްޔިތުންނަށް ލިބޭ ހިދުމަތަށް ބަދަލު ނާންނާނެ ކަމަށެވެ.
މިނިސްޓަރު ޒަމީރު ވިދާޅުވީ އާސަންދައިގެ އިސްރާފު ކުޑަކުރުމުން 500 މިލިއަންވަރު ސަލާމަތް ކުރެވޭނެ ކަމަށެވެ.
