އަންނަ އޭޕްރީލް މަހުން ފެށިގެން ތަޢާރަފުކުރާ އައު ސަބްސިޑީ ނިޒާމުގެ ދަށުން ރާއްޖޭގެ 70 އިންސައްތަ ގޭބީސީތަކަށް ސަބްސިޑީ ލިބޭނެ ކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ ސީއީއޯ ހީނާ ވަލީދު ވިދާޅުވެއްޖެ އެވެ.

މިހާރު ނޫހަށް ދެއްވި ޚާއްޞަ އިންޓަވިއުއެއްގައި ހީނާ ވިދާޅުވީ، މިހާރު ބޭނުންކުރާ ސަބްސިޑީ ނިޒާމު ޓާގެޓެޑް ސަބްސިޑީ ނިޒާމަކަށް ބަދަލުކުރާނެ ކަމަށެވެ. މި ބަދަލާ އެކު، އެންމެ ބޭނުންވާ ގޭބިސީތަކަށް ސަބްސިޑީ ލިބޭނެ ކަމަށް އޭނާ ވިދާޅުވި އެވެ.

”އާބާދީއިން އަޅުގަނޑު ދަންނަވާނީ މި ނިޒާމުގެ ތެރެއިން ގާތްގަނޑަކަށް 60 އާއި 70 އިންސައްތައާއި ދެމެދުގެ ގޭބިސީތަކަށް ސަބްސިޑީ ލިބޭނެ ކަމަށް،“ ހީނާ ވިދާޅުވި އެވެ.

މި ބަދަލު ތަންފީޒު ކުރުމުގެ ކުރިން އާމްދަނީއާއި ދިރިއުޅުމުގެ ފެންވަރު ވަޒަންކުރުމަށް ދިރާސާއެއް ކުރާނެ ކަމަށާއި، އެ ދިރާސާގެ ނަތީޖާއަށް ބިނާކޮށް ސަބްސިޑީ ދޭނެ ކަމަށް ވެސް ހީނާ ވިދާޅުވި އެވެ.

މިހާރު ޢަމަލުކުރަމުންދާ ނިޒާމުގެ ދަށުން ސަބްސިޑީގެ 43 އިންސައްތަ ލިބެނީ އާބާދީގެ އެންމެ މުއްސަނދި 40 އިންސައްތަ ފަރާތްތަކަށް ކަމަށް ތަފާސް ހިސާބުތަކުން ދައްކަ އެވެ. އަދި އެންމެ ފަގީރު 20 އިންސައްތަ މީހުންނަށް ލިބެނީ ދައުލަތުގެ ސަބްސިޑީގެ އެންމެ 17 އިންސައްތަ އެވެ.

އަންނަ އަހަރުގެ ބަޖެޓުގައި ސަބްސިޑީ ދިނުމަށް 900 މިލިއަން ރުފިޔާ ކަނޑައަޅާފައިވާ ކަމަށް ވެސް ހީނާ ފާހަގަކުރެއްވި އެވެ.

މި އައު ނިޒާމުގެ ސަބަބުން ސަބްސިޑީ އެންމެ ބޭނުންވާ ފަރާތްތަކަށް އަމާޒުކުރެވި، ދައުލަތުގެ ވަސީލަތްތައް އެންމެ އެކަށީގެންވާ ގޮތުގައި ބޭނުންކުރެވޭނެ ކަމަށް އުއްމީދު ކުރެވެ އެވެ.

ހީނާ ވަލީދު ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ)