މީޑިއާ ކޮންޓްރޯލް ބިލް ޕީއެންސީގެ ޕީޖީ އިން ބޭރުކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިގޮތަށް ވިދާޅުވީ ރޭ ސަރުކާރަށް އެއް އަހަރު ފުރުމާއި ގުޅިގެން ބޭއްވި ހާއްސަ ޖަލްސާއަށް ފަހު ރައީސްއަށް އަމާޒުވި ސުވާލަކަށް ޖަވާބުދެއްވަމުން ނެވެ.
މޯލްޑިވްސް ޖާނަލިސްޓް އެސޯސިއޭޝަންގެ އެކްސްކޯ މެންބަރު އަދި ’ދައުރު’ގެ ސީނިއާ ނޫސްވެރިޔާ މުޒައްޔިން ނާޒިމް ރައީސް މުއިއްޒުއާ ރޭ ސުވާލުކުރުމުން ވިދާޅުވީ، އަމިއްލަ މެންބަރަކު މަޖިލީހަށް މިހާރު ވައްދާފައިވާ ”މީޑިއާ ކޮންޓްރޯލް ބިލް“ ބަލައިގަންނަން ޕީއެންސީގެ ޕާލިމަންޓްރީ ގްރޫޕުން ވޯޓް ނުދޭނެ ކަމަށާއި އެ ބިލް މަޖިލީހުން ބޭރުކުރާނެ ކަމަށެވެ.
މި ބިލް ހުށަހަޅުއްވާފައިވަނީ ތުޅާދޫ ދާއިރާގެ މެންބަރު އަބްދުލް ހަންނާނެވެ.
މިހާރު ރައްޔިތުންގެ މަޖިލީހަށް ހުށަހަޅާފައިވާ މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން ބިލުން، ބޮޑެތި އަދަދުތަކުން ނޫސްވެރިންނާއި މީޑިއާތައް ޖޫރިމަނާ ކުރުމާއި ނޫސްތަކާއި މީޑިއާތައް ބަންދު ކޮށްލުމުގެ ފުރިހަމަ މިނިވަންކަން ސަރުކާރަށް ލިބޭ ކަމަށް ބުނެފައި ވެއެވެ. އެހެންކަމުން އެފަދަ ނާތަހުޒީބު ބިލުތައް ފާސްކުރުމަށް ކުރަމުންދާ މަސައްކަތް ހުއްޓާލުމަށް ގޮވާލާފައިވެ އެވެ.
މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޯޑްކާސްޓިން ކޮމިޝަން އުވާލައި، “މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން” ގެ ނަމުގައި ހުށަހެޅިފައިވާ ބިލްގައިވާ ގޮތުން އާ ކޮމިޝަނުގައި ތިބޭނީ ޖުމްލަ ހަތް މެމްބަރުން ނެވެ. އޭގެ ތެރެއިން ހަތަރު މެމްބަރުންނަކީ ރައްޔިތުންގެ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ މެންބަރުން ނެވެ. އަނެއް ތިން މެންބަރުންނަކީ މީޑިއާތަކުން އައްޔަންކުރާ މެންބަރުން ނެވެ.
މީޑިއާ ތަމްސީލުކުރާ ތިން މެންބަރުން އިންތިހާބު ކުރުމަށް ވޯޓުލެވޭނީ، ގާނޫނުތަކުގެ ދަށުން ރަޖިސްޓަރީ ކޮށްގެން ހިންގާތާ ފަސް އަހަރު ވެފައިވާ ބްރޯޑްކާސްޓަރުންނާއި މީޑިއާތަކާއި އެ ތަންތަނުގައި މަސައްކަތް ކުރާ ނޫސްވެރިންނަށެވެ. އަދި ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.
މީގެ އިތުރުން، މި ބިލުގައި މީޑިއާތަކުން އަމަލު ކުރަން ޖެހޭ ސުލޫކީ މިންގަނޑާ ތަކުރާރުކޮށް ޚިލާފު ވެއްޖެ ނަމަ 5،000 ރުފިޔާއާއި 50،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބަޔާންކޮށްފައި ވެއެވެ. އަދި ވަކިވަކި ނޫސްވެރިން 5،000 ރުފިޔާއާއި 10،000 ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެ ކަމަށްވެސް ބިލުގައި ބަޔާންކޮށްފައި ވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކޮންގްރެސް ޕާޓީ މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް) މޯލްޑިވްސް މީޑިއާ ކައުންސިލް (އެމްއެމްސީ)
