އޭޝިއާސް ޕްރިމިއާ ލީޑާޝިޕް އެންޑް ސަސްޓެއިނަބިލިޓީ އެވޯޑް އިން ދޭ އިންޑަސްޓްރީ ޗެމްޕިއަންސް އޮފް ދަ ޔެެއާ އެވޯޑް، ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް ލިބިއްޖެ އެވެ.
މި އެވޯޑަކީ މެލޭޝިޔާގެ މީޑިއާ ކޮންސަލްޓެންސީއަކުން އޭޝިޔާ ސަރަހައްދުގެ ކުންފުނިތަކަށް ދޭ ހާއްސަ ޝަރަފްވެރި އެވޯޑެކެވެ. މިއީ ރާއްޖޭގެ ކުންފުންޏަކަށް މި އެވޯޑް ލިބުނު ފުރަތަމަ ފަހަރެވެ. އޭޗިއާސް ޕްރިމިއާ ލީޑާޝިޕް އެންޑް ސަސްޓެއިނަބިލިޓީ އެވޯޑްގެ ވެބްސައިޓްގައި ޝާއިއުކޮށްފައިވާ ހަބަރުގައި ވަނީ ސްޓެލްކޯގެ ހާއްސަ އުސްއަލިތައް ފާހަގަކޮށްފަ އެވެ.
ސްޓެލްކޯ އިން ދަނީ ދެމެހެއްޓެނިވި ހަކަތައިގެ މުސްތަގުބަލެއް ހޯދުމަށް އީޖާދީ ގޮތްތަކެއް ހޯދަމުން ކަމަށް ހަބަރުގެ ތައާރަފުގައި ބުނެފައި ވެއެވެ. 1997 ގައި ސްޓެލްކޯގެ ހިދުމަތް މާލޭގައި ދޭން ފެށީ 50 ގޭބީސީއަކަށެވެ. އޭގެ ފަހުން އެކުންފުނންި ވަނީ މާލޭގެ އިތުރުން އަތޮޅުތެރޭގެ ބައެއް ރަށްރަށާއި ރިޒޯޓްތަކަށްވެސް ހިދުމަތް ދޭން ފަށާފަ އެވެ. މިހާރު އެކުންފުނިން ދަނީ 60،000 ކަސްޓަމަރުންނަށް ހިދުމަތް ދެމުން ނެވެ.
ސްޓެލްކޯއިން ވަނީ ފޮސިލް ފިއުލްއަށް ބަރޯސާވުން ކުޑަކުރުމުގެ އިތުރުން އޮޕަރޭޝަނަލް އެފިޝަންސީ އިތުރުކުރުމަށް ސޯލާ ޕީވީ ސިސްޓަމްސް، ބެޓެރީ އެނާޖީ ސްޓޯރޭޖް ސިސްޓަމްސް (ބީއީއެސްއެސް)، އަދި އެނާޖީ މެނޭޖްމަންޓް ސިސްޓަމް (“އީއެމްއެސް”) ފަދަ ޒަމާނީ ޓެކްނޮލޮޖީތައް ބޭނުންކުރަން ފަށާފަ އެވެ. މިހާރުގެ ލީޑަޝިޕްގެ ދަށުން ސްޓެލްކޯއިން ވަނީ އިލެކްޓްރިކް މޮޓޯސައިކަލްތަކުގެ އިތުރުން އިލެކްޓްރިކް ވެހިކަލް (“އީވީ”) ޗާޖިން އިންފްރާސްޓްރަކްޗަރ ތައާރަފްކޮށް، ސޯލާ ޕެނަލްތަކާއި ޒަމާނީ ޕަވަރ ސިސްޓަމްތައް ހިމެނޭ ގޮތަށް ކުންފުނީގެ ޕޯޓްފޯލިއޯ ފުޅާކޮށްފަ އެވެ. މީގެ އިތުރުން ސްޓެލްކޯގެ އަމާޒަކީ 2028 ވަނަ އަހަރުގެ ނިޔަލަށް އިއާދަކުރަނިވި ހަކަތައިން އުފައްދާ ހަކަތައިގެ %33 އުފެއްދުމެވެ.
އެޑްވާންސްޑް މީޓަރިން އިންފްރާސްޓްރަކްޗާ (އޭއެމްއައި) ތައާރަފް ކޮށްގެން ކަސްޓަމަރުންނަށް ކަރަންޓް ބޭނުންކުރާ މިންވަރު ދެނެގަންނަން ސްޓެލްކޯއިން މަގުފަހިކުރުވި އެވެ. އޭއެމްއައި އާއެކު، ކަސްޓަމަރުންނަށް ސީމްލެސް ކަސްޓަމަރ ޕޯޓަލް ނުވަތަ މޯބައިލް އެޕް މެދުވެރިކޮށް ރިއަލް ޓައިމްގައި ހަކަތަ ބޭނުންކުރާ މިންވަރު މޮނިޓަރ ކުރެވޭއިރު، ކަރަންޓް އިގްތިސާދު ކުރުމަށް ފަސޭހަތަކެއް ލިބިގެންދެ އެވެ. މީގެ އިތުރަށްވެސް، ސްޓެލްކޯއިން ވަނީ ޕަވަރހައުސްތަކުގެ ތެރެއިން ރިއަލް ޓައިމް ފޯލްޓް ޑިޓެކްޝަން ކަށަވަރުކުރުމަށް ސްކާޑާ ސިސްޓަމެއްވެސް ބޭނުން ކުރަން ފަށާފަ އެވެ.
އެ ކުންފުނިން ދަނީ މުވައްޒަފުންގެ ހުނަރު ތަރައްގީކުރުމަށްވެސް ހަރަދުް ކުރަމުން ނެވެ. ސްޓެލްކޯ ނޮލެޖް ހަބް ފަދަ ޕްލެޓްފޯމްތަކުގެ ތެރެއިން މެދުނުކެނޑި އުނގެނުމުގެ ސަގާފަތެއް އާލާކޮށްފައި ވެއެވެ. މި އިސްނެގުމަކީ މުވައްޒަފުންގެ ގާބިލުކަން ބިނާކުރުމުގެ އިތުރުން އަމިއްލަ ތަރައްގީއާއި ކުންފުނީގެ ސްޓްރެޓެޖިކް މަގްސަދުތަކާ އެއްގޮތްވާ ކަމެއް ކަމަށް ސްޓެލްކޯ އިން ބުނެ އެވެ. މަތީ ފެންވަރުގެ ހުނަރުވެރިންގެ މެދުގައި ތަނަށް ލޯބިވާ މިންވަރު އިތުރުކުރުމަށް ސްޓެލްކޯއިން ރަނގަޅު މުސާރަތަކެއް ދެއެވެ. ތަމްރީނާއި މެންޓަޝިޕް އަދި ލީޑަޝިޕް ޕްރޮގްރާމްތަކުގެ ތެރެއިން މުވައްޒަފުންގެ ކެރިއަރުގައި ކުރިއެރުން ތަރައްގީ ކުރަންވެސް ސްޓެލްކޯއިން މަސައްކަތް ކުރެ އެވެ. ހަމައެއާއެކު، މިންތީގެ ހަމަހަމަކަމުގެ މުހިންމުކަން ދެނެގަނެ، އެކުންފުނިން ވަނީ އަންހެން މުވައްޒަފުންނަށް އެހީތެރިވުމަށް މަސައްކަތްތަކެއް ހިންގައި، ކުންފުނީގެ ތެރޭގައި އަންހެނުންނަށް ހުރި ފުރުސަތުތަކުގެ ދާއިރާ ފުޅާކޮށްފަ އެވެ.
