ހުޅުމާލެ ހިޔާ ފްލެޓުގެ އެޕާޓްމަންޓެއްގައި މީހަކު ރަހީނުކުރި މައްސަލައިގައި ހައްޔަރުކުރި މީހުންގެ ބަންދު މުއްދަތު އިތުރުކޮށްފި އެވެ.
މިމައްސަލައިގައި ހައްޔަރު ކޮށްފައިވަނީ އަލްމާން އަލީ ހާލިދު / ގދ. ވާދޫ، މުހައްމަދު އިޒްކާން / މާލެ، އިޒާން އަހްމަދު / ކ. ގުރައިދޫ، އަހްމަދު ޒާހިރު / ށ. ފޯކައިދޫ، އާދަމް ހުސައިން / ލ. މާވަށް، އިބްރާހީމް ނަޝީދު / ލ. އިސްދޫ، އަހްމަދު ސަމީހު / ބ. ގޮއިދޫ، އިސްމާއީލް ވިސާމް މުހައްމަދު / ކ. މާލެ، ވިޝާމް މުހައްމަދު / ގދ. ވާދޫ، ވިސާމް މުހައްމަދު / ހުޅުމާލެ ހިޔާ 14-17-03, މުޝްތާގު ޝާކިރު / ގދ. ވާދޫ އަދި ހަސަން ޣާލިބު / މ. ކޮޅުފުށި އެވެ.
ފުލުހުން މިއަދު ބުނެފައިވަނީ މި މީހުންގެ ބަންދާމެދު އިތުރަށް ގޮތެއް ނިންމުމަށް ކޯޓަށް ހާޒިރުކުރުމުން އަހުމަދު ޒާހިދްގެ ބަންދަށް 5 ދުވަސް، އަލްމަން އަލީ ޚާލިދް، މުހައްމަދު އިޒްކާން އަދި އިޒާން އަހުމަދުގެ ބަންދަށް 8 ދުވަހުގެ މުއްދަތެއް ދީފައިވާ ކަމަށެވެ. އަދި ބާކީ ދެންތިބި މީހުން ތަހުގީގުު މަރުހަލާ ނިމެންދެން ބަންދުކުރުމަށް އަމުރުކޮށްފައިވާ ކަމަށެވެ.
ރަހީނުކޮށްފައި ހުރި މީހާ ހުރީ H9 ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމެންޓުގައި ކަމަށާއި ފުލުހުން ވަނީ އެޕާޓްމެންޓްގެ ދޮރު ވައްޓާލައިގެން ކަމަށް ފުލުހުން މީގެކުރިން ބުނެފައިވެ އެވެ.
ފުލުހުން އެތަނަށް ވަން އިރު، ރަހީނުކުރި މީހާގެ ބޯ ބާލުވާފައިވާ ކަމަށާއި، އޭރު އެމީހާގެ އިނގިލި ބުރިކޮށްލަން ތައްޔާރުވަމުންދިޔަ ކަމަށްވެސް ފުލުހުން ބުނެފައިވެ އެވެ.
